Shërbimi Korrektues i Kosovës ka njoftuar se është parandaluar një rast i futjes së kontrabandës në Qendrën Korrektuese të Dubravës.
Sipas njoftimit zyrtar, gjatë një kontrolli rutinor të një vizitori në hyrje të institucionit, zyrtarët korrektues kanë zbuluar dy telefona mobilë të tipit iPhone dhe dy kartela SIM të kamufluara në trupin e tij. Pajisjet janë konfiskuar menjëherë nga autoritetet.
Për rastin është njoftuar edhe Policia e Kosovës, ndërsa vizita e personit në fjalë është anuluar.
Autoritetet kanë bërë të ditur se ndaj të dyshuarit janë ndërmarrë veprimet përkatëse në përputhje me procedurat ligjore në fuqi.
Shërbimi Korrektues i Kosovës theksoi se do të vazhdojë me kontrolle të rregullta dhe zbatim rigoroz të masave të sigurisë, me qëllim parandalimin e futjes së kontrabandës dhe ruajtjen e rendit dhe sigurisë në institucionet korrektuese.
