Pavarësisht armëpushimit të shpallur mes Izraelit dhe Hamasit, fëmijët në Rripin e Gazës vazhdojnë të vdesin nga sulmet, kushtet ekstreme të motit dhe mungesa e ndihmës jetike. Alarmin e ka ngritur zëdhënësi i UNICEF-it, James Elder, i cili ndodhet aktualisht në Gaza dhe po dëshmon nga afër realitetin e përditshëm të fëmijëve palestinezë.
Në një ditë të përshkruar si “e zymtë”, Elder flet për stuhi të forta, shi të pandërprerë dhe erë që përkul çadrat e improvizuara ku strehohen mijëra familje. Fëmijët, të lagur dhe të ekspozuar ndaj të ftohtit, nuk kanë asnjë mundësi reale për t’u ngrohur. “Kjo gjendje zgjat prej dy vjetësh e gjysmë. Flasim për fëmijë që kanë vuajtur nga kequshqyerja dhe kanë sistem imunitar të dobësuar”, thekson ai.
Edhe pse armëpushimi ka sjellë disa zhvillime pozitive, si hapja e një qendre arsimore të UNICEF-it në veri të Gazës dhe funksionalizimi i disa qendrave shëndetësore, Elder thekson se këto hapa janë larg të qenit të mjaftueshëm. Sipas tij, që nga shpallja e armëpushimit janë vrarë rreth 100 fëmijë, çka do të thotë se mesatarisht një fëmijë humb jetën çdo ditë, edhe në periudhën që supozohej të ishte e qetë.
Situata humanitare mbetet dramatike. Ndihma nuk po hyn në sasinë e nevojshme, ndërsa autoritetet izraelite vazhdojnë të pengojnë furnizimet me ilaçe bazë dhe gaz për gatim. “Një fëmijë duhet të flejë në një vend të sigurt, të ngrohet, të hajë, të shkojë në shkollë. Sot, fëmijët në Gaza po arrijnë vetëm një ose dy nga këto gjëra”, shprehet Elder.
Veçanërisht shqetësuese është situata gjatë dimrit. Sipas UNICEF-it, të paktën shtatë fëmijë të vegjël kanë vdekur nga hipotermia, ndërsa numri mund të rritet. “Të jetosh në çadra për dy vjet e gjysmë, në mes të dimrit, është një vuajtje e papërshkrueshme”, thotë Elder.
Ai paralajmëron se pa lejimin e një fluksi të pakufizuar të ndihmës humanitare, shkatërrimi fizik, psikologjik dhe shoqëror i Gazës do të thellohet edhe më tej, duke e bërë armëpushimin një fjalë bosh për fëmijët që vazhdojnë të paguajnë çmimin më të rëndë të luftës.
