Presidenti i Shteteve të Bashkuara, Donald Trump, deklaroi të hënën se administrata e tij do t’i dërgojë armë shtesë Ukrainës, në përpjekje për të përforcuar mbrojtjen e saj përballë sulmeve të vazhdueshme ruse.
“Do të dërgojmë më shumë armë. Duhet ta bëjmë”, u shpreh Trump gjatë një darke me kryeministrin izraelit Benjamin Netanyahu. Ai shtoi se bëhet fjalë kryesisht për armë mbrojtëse, duke theksuar se Ukraina po përballet me një situatë tepër të rëndë: “Ata po goditen shumë, shumë rëndë. Ukrainasit duhet të jenë në gjendje të mbrojnë veten. Shumë njerëz po vdesin në atë rrëmujë”.
Ky qëndrim vjen pas një pauze të përkohshme në dërgesat ushtarake për Ukrainën nga ana e Pentagonit, që ndodhi për shkak të shqetësimeve mbi rezervat aktuale të ushtrisë amerikane. Zyrtarët e Shtëpisë së Bardhë u përpoqën të sqarojnë se pauza nuk kishte lidhje me ndonjë vendim të Trump, por ishte pjesë e një “rishikimi rutinë të arsenaleve ekzistuese”.
Sekretarja e shtypit e Shtëpisë së Bardhë, Karoline Leavitt, bëri të ditur se Sekretari i Mbrojtjes, Pete Hegseth, kishte urdhëruar Pentagonin të rishikojë dërgesat për të siguruar se ato përputhen me interesat kombëtare të SHBA-së dhe me nevojat e forcave të saj të armatosura.
Ndërkohë, burime diplomatike nga Washingtoni konfirmuan për gazetën Kyiv Post se Trump ka kërkuar nga këshilltarët e tij mundësi për të përshpejtuar dërgesat e sistemeve të mbrojtjes ajrore në Ukrainë. Kjo erdhi pas një bisede telefonike të premten me presidentin ukrainas Volodymyr Zelensky, të cilën Trump e quajti “strategjike”, pa dhënë më shumë hollësi.
Po atë javë, Trump gjithashtu pati një bisedë telefonike me presidentin rus Vladimir Putin. “Jam i zhgënjyer, sinqerisht, që presidenti Putin nuk është ndalur. As unë nuk jam i kënaqur për këtë”, deklaroi Trump për mediat.
Komentet e tij u mirëpritën nga ligjvënësit republikanë që mbështesin Ukrainën. Deputeti Don Bacon reagoi duke thënë: “Kjo është përgjigjja absolutisht e duhur pasi Putin bombardon qytetet ukrainase çdo natë. Putini duhet të jetë i bindur se nuk mund të fitojë”.
Sidoqoftë, analistët politikë kanë vënë re një ndarje të theksuar brenda administratës Trump në lidhje me politikën ndaj Ukrainës. Scott Cullinane, bashkëthemelues i Aleancës SHBA-Evropë, theksoi: “Lëvizja MAGA dhe administrata Trump nuk janë të unifikuara kur bëhet fjalë për politikën e jashtme – kjo përplasje është e dukshme, sidomos në çështjen e Ukrainës”.
Edhe analistë të sigurisë, si Colby Badhwar nga grupi kërkimor Tochnyi, mendojnë se angazhimi për të përmbushur premtimet e mëparshme të administratës Biden për dërgimin e armëve do të ishte një hap pozitiv, ndonëse mbetet për t’u parë nëse Trump do të japë zotime të reja. Ai theksoi se Gjermania ka shprehur interes për të blerë dy bateri të tjera të sistemit raketor Patriot për t’i dërguar në Ukrainë, duke shtuar: “Miratimi i kësaj shitjeje armësh do të ishte shumë pozitiv”.
Më vonë gjatë ditës së hënë, Pentagoni lëshoi një deklaratë zyrtare, ku njoftoi se, me udhëzimin e Trump, do të dërgohen armë shtesë mbrojtëse në Ukrainë. Zëdhënësi i Pentagonit, Sean Parnell, tha se kjo bëhet për të “siguruar që ukrainasit të mund të mbrojnë veten ndërsa punojmë për të ndalur gjakderdhjen dhe për të arritur një paqe të qëndrueshme”.
