Të paktën 13 palestinezë u vranë dhe dhjetëra të tjerë u plagosën nga sulmet e reja izraelite në Rripin e Gazës, tashmë të shkatërruar nga lufta, raportoi të hënën agjencia zyrtare palestineze e lajmeve, Wafa.
Sipas raportimeve, pesë persona humbën jetën kur forcat izraelite goditën një apartament në zonën al-Mawasi, në perëndim të Khan Younisit në jug të Gazës.
Pesë të tjerë u vranë dhe më shumë se 30 u plagosën në një sulm ajror ndaj një shtëpie trekatëshe në lagjen e njohur si “japoneze”, në perëndim të qytetit.
Ndërkohë, në një sulm tjetër në kampin e refugjatëve al-Maghazi në Gazën qendrore, tre palestinezë të tjerë u vranë dhe disa u plagosën pasi një shtëpi u bombardua nga forcat izraelite.
Izraeli ka mbajtur një bllokadë të rreptë ndaj Gazës për më shumë se 18 vjet dhe që nga 2 marsi ka mbyllur të gjitha pikat e kalimit, duke rënduar më tej gjendjen humanitare në këtë territor të rrethuar.
Që nga 7 tetori 2023, ushtria izraelite ka zhvilluar një ofensivë intensive në Gaza, duke shkaktuar vdekjen e afro 60.000 palestinezëve, shumica prej tyre gra dhe fëmijë. Bombardimet e vazhdueshme kanë lënë pas një shkatërrim të gjerë dhe mungesë të theksuar ushqimesh.
Në nëntor të vitit të kaluar, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, duke i akuzuar për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për fushatën e tij ushtarake në këtë enklavë.
