Suspendohen dy oficerë doganor

Drejtori i përgjithshëm i Doganës se Kosovës, Lulzim Rafuna të enjten ka suspenduar dy oficerët doganor pas dyshimeve që të njëjtit kanë keqpërdorur pozitën zyrtare, me rastin e importit të mallrave përmes pikë kalimit kufitar të Jarinjes.
Deri tek ky rast erdhi pas ndalimit të një maune dhe ri-kontrollimit të saj në drejtorinë regjionale të Mitrovicës me ketë rast është konstatuar se vlera e mallit të padeklaruar kap shifrën e përafërt prej 45.000 euro.
“Oficerët dyshohet se nuk kanë përmbushur detyrat zyrtare respektivisht nuk kanë kryer shikimin adekuat të ngarkesës që bie ndesh me procedurat doganore dhe si rrjedhojë kanë mundësuar që një sasi e mallrave e padeklaruar të futen në territorin e Kosovës pa iu nënshtruar pagesës së detyrimeve importuese doganore. Ndaj dy oficerëve doganor të suspenduar kanë filluar procedurat penale për keqpërdorim të detyrës zyrtare ku hetimet janë duke u udhëhequr nga njësit hetimore të doganës nën mbikëqyrjen e prokurorisë themelore të Mitrovicës”, kanë bërë të ditur zyrtarët doganorë.
Përveç suspendimit të oficerëve dogana ka konfiskuar maunën dhe mallrat e padeklaruara si dhe ka iniciuar procedimin penal në ndaj kompanisë, e cila ka tentuar të fus ilegalisht këto mallra.
Ky rast tregon edhe një herë përkushtimin e menaxhmentit të Doganës së Kosovës për të luftuar dukuritë negative, deri tani që nga fillimi i vitit janë suspenduar 14 oficerë doganor.