Pjesë nga Pesë Shtyllat e Prosperitetit (Botim i Shkurtuar) nga M. Yaqub Mirza – Kapitulli: Shtylla e Dytë.
Doktrina ekonomike islame thekson punën e palodhur, produktivitetin dhe gjenerimin e tepricës. Teprica bën të mundur kursimin, qoftë për të papriturat e së ardhmes, pasardhësit apo qëllime të tjera – si investimi, kryerja e blerjeve të mëdha, ose dhënia për të ndihmuar nevojtarët dhe mbështetja e projekteve të së mirës publike. Prandaj, ndërsa shtylla e parë e prosperitetit është gjenerimi i të ardhurave të mjaftueshme për të përmbushur nevojat aktuale të konsumit të individit dhe familjes së tij, shtylla e dytë është gjenerimi i kursimeve.
Guri i themelit për arritjen e lirisë financiare është njohja se ju jeni përgjegjës për mirëqenien tuaj financiare, dhe dëshira për të kursyer është hapi i parë drejt lirisë financiare.
Gjeni të gjitha temat e këtij libri brenda këtij linku më poshtë:
https://dijaonline.com/tag/pese-shtyllat-e-prosperitetit/
Disa njerëz mendojnë se shpirtërorja dhe kursimi nuk shkojnë së bashku. Por nuk ka asgjë joshpirtërore në të pasurit para të lëna mënjanë për investime dhe për nevojat e ardhshme. Kjo nuk tregon në asnjë mënyrë mungesë besimi në furnizimet e Zotit. Profeti Muhamed i nxiste Shokët e tij të ishin të matur duke mos shpenzuar gjithçka që kishin. Kurani tregon se si, në kohë bollëku, Profeti Jusuf (Jozefi) organizoi rezerva të mëdha për të përballuar nevojat e urisë (K 12:47–49). Autori Dwight Nichols, një i krishterë, thekson në Planet e Zotit për Financat Tuaja se, sipas shkrimeve të shenjta (Fjalët e Urta 6:6–8 dhe 21:20), një person që ruan në kohë bollëku dhe përgatitet për dimër është i mençur.
Guri i themelit për arritjen e lirisë financiare është njohja se ju jeni përgjegjës për mirëqenien tuaj financiare, dhe dëshira për të kursyer është hapi i parë drejt lirisë financiare. Kurani gjithashtu dëshiron që ju të jeni të vetëdijshëm për aktivitetet tuaja financiare dhe efektet e tyre te vetja, familja dhe të tjerët: “O ju që besuat! Ju keni përgjegjësi për veten tuaj” (K 5:105). Për fat të keq, shumë pak njerëz në Amerikë sot po ndjekin këtë mençuri të logjikës së shëndoshë.
Warren Buffet jep këshillat e mëposhtme:
- Jetoni jetën tuaj sa më thjeshtë që të mundeni.
- Mos u joshni nga etiketa e markës; në vend të kësaj vishni gjëra që janë bërë mirë dhe janë të rehatshme.
- Shmangni shpenzimet e kota.
- Menaxhoni jetën dhe prioritetet tuaja në mënyrë që të mund të jetoni me më pak sesa fitoni, duke kursyer 20% (ose preferohet 30% ose më shumë) nga gjithçka që fitoni.
A është një qindarkë e kursyer një qindarkë e fituar, siç tha Benjamin Franklin? Jo krejtësisht, sepse një qindarkë e kursyer është me të vërtetë e barabartë me një e gjysmë qindarka të fituara; domethënë, është shuma që do të kishit pas pagimit të taksave për 1.5 qindarka. Si është kështu? Taksat federale, shtetërore dhe të shitjes të kombinuara janë afërsisht 33 për qind. Prandaj, 1.50$ të fituara – .50 taksë (33% e 1.50$) = 1.00$ neto. Kështu që kur shpenzoni 1.00$, ndaluni dhe mendoni, sepse në të vërtetë po shpenzoni 1.50$ të fituara. Anasjelltas, nëse shkurtoni shpenzimet dhe kurseni 1.00$, në të vërtetë po fitoni 1.50$.
“Nëse bëni të ardhura të mira çdo vit dhe i shpenzoni të gjitha, nuk po bëheni më të pasur. Thjesht po jetoni jetë të lartë.” — Thomas J. Stanley dhe William D. Danko, Milioneri Pranë
Disa Mendime për të Ecur Drejt Jetesës pa Borxhe
Gjatë kërkimit për librin, kam hasur në shumë burime që ofrojnë sugjerime për të ecur drejt një jete pa borxhe. Shumica e këtyre sugjerimeve bien në një nga dy kampet. Në njërin, shumica marrin atë që unë do ta konsideroja një qasje teknike për eliminimin e borxhit – vendosjen e një buxheti (dhe jetesën sipas tij), negociatat me kreditorët (për të ulur ose eliminuar borxhin) dhe koncepte si “përshpejtimi i borxhit”. Kampi tjetër merr një qasje më krijuese: prerja e kuponëve, koha e blerjeve për të shfrytëzuar shitjet, skemat e blerjeve me shumicë dhe mjete të tjera për “zgjatjen” e dollarit. Të dyja kampet mund t’ju çojnë në të njëjtën rrugë – një rrugë të jetesës pa borxhe. Dhe për ata prej jush që mund t’i gjejnë këto strategji shumë ekstreme, ajo që vijon është një përzierje nga të dyja kampet që besoj se mund t’ju shërbejë mirë.
- Hapi 1: Vlerësoni tablonë tuaj aktuale të borxhit.
- Hapi 2: Riorganizoni rrjedhën tuaj të parasë.
- Hapi 3: Filloni të jetoni mbi bazën “Paguaj dhe Merr” (Cash and Carry).
- Hapi 4: Filloni të kurseni para.
- Hapi 5: Rrisni të ardhurat tuaja neto.
- Hapi 6: Krijoni një Plan Shpenzimi (i njohur ndryshe si: “Buxhet”)
- Hapi 7: Vendosni Qëllimet Tuaja Financiare.
Shpenzimet e vogla patjetër që mblidhen, veçanërisht kur trajtojmë “dëshirat” si “nevoja”.
Burimi: Pesë Shtyllat e Prosperitetit (Botim i Shkurtuar), Shtylla e Dytë: Kursimi.
