Janë 3.5 mijë metër kub dru që janë dëmtuar vetëm për tre muaj. Siç njofton Ministria e Bujqësisë, gjatë këtyre tre muajve, për këta dëmtues janë shqiptuar 1349 fletëparaqitje.
“Ashtu sikurse viteve të kaluara, edhe gjatë tremujorit të parë të këtij viti dëmtuesit e pyjeve nuk kanë mbetur pa u adresuar tek autoritetet përgjegjëse nga rojet dhe inspektorati pyjor”, thuhet në komunikatën e kësaj ministrie.
Siç thuhet në komunikatë, gjatë vitit që lamë pas, për dëmtimin e masës drusore prej rreth 14 mijë metër kub dru, janë shqiptuar 5593 fletëparaqitje.
Ndërsa 600 prej atyre fletëparaqitjeve, prej tyre kanë qenë të ngritura nga inspektorati i Agjencionit Pyjor të Kosovës, në të cilat sipas Ministrisë së Bujqësisë ka pasur të përfshirë edhe fletëparaqitje që kanë të bëjnë me zyrtarë komunalë.
Ndërsa, në krahasim me vitin 2012, ku për dëmtimin e masës drusore prej rreth 24 mijë metër kub dru, janë shqiptuar 7589 fletëparaqitje, del se në vitin 2013, dëmtimi i masës drusore ka qenë dukshëm më i vogël.
