Qëllimi i serbëve në lagjet veriore të Mitrovicës të banuara me popullatë të përzier, ndonëse i ditur që më parë, tashmë po bëhet publik. Ata në trojet e blera nga shqiptarët, do të ndërtojnë objekte shumëkatëshe banimi, e jo shtëpi të përmasave çfarë ishin më parë të ndërtuara nga shqiptarët.
Burime të Kosovapress-it bëjnë të ditur se sot në ora 10:00 do të vuhet gurthemeli i tri ndërtesave katërkatëshe me nga 12 banesa, dy prej të cilave në lagjen ‘Kroi i Vitakut’ dhe një ndërtesë në fshatin Suhodoll në veri të Mitrovicës.
Sipas këtyre burimeve, këto ndërtesa po bëhen me para të Qeverisë së Serbisë, ndërsa edhe vënien e gurthemeleve do ta bëjë kryetari i organit të përkohshëm të komunës në veri të Mitrovicës, Aleksandar Spiriq, që më parë ishte caktuar në këtë pozitë nga Beogradi, dhe jo kryetari legal i kësaj komune i dal nga zgjedhjet e fundit, Goran Rakiq.
“Ndërtesat të cilat po ndërtohen në emër të familjeve me gjendje të rëndë ekonomike, do t’u jepen kryesisht pjesëtarëve të të ashtuquajturës ‘Civilna Zastita’ dhe disa nga rojat e urës, një pjesë e të cilëve nuk janë fare nga Kosova, por nga vise tjera”, kanë thënë burimet.
Në anën tjetër, ndërtimi i këtyre ndërtesave shumëkatëshe në Kroin e Vitakut dhe Suhodoll në veri të Mitrovicës, ka shqetësuar shqiptarët që jetojnë në atë pjesë të qytetit.
Ata brengosen për tendencën e ndërrimit të strukturës etnike në këtë lagje nga ana e Qeverisë së Serbisë dhe këto ndërtime i quajnë kryekëput politike që kanë për qëllim kolonizimin e veriut me serbë, ndërkohë që kërkojnë mbështetje më të fuqishme institucionale.
Emir Azemi, zëvendës-kryesues i Kuvendit Komunal në veri të Mitrovicës, ka kërkuar që urgjentisht të ndërpritet kolonizimi nëpër lagjet e banuara me popullatë të përzier, që ka për qëllim ndryshimin e strukturës demografike, dhe që është mentalitet i viteve të 90-ta.
“Do të kërkojë menjëherë sot një seancë të jashtëzakonshme të Kuvendit për të marrë vendim që të ndërpriten menjëherë këto punime, të cilat kanë për qëllim kolonizimin e veriut dhe të cilat po bëhen pa leje”, ka thënë për KosovaPress Azemi.
Ai tha se në lidhje me këtë do t’i informojë edhe ambasadat e huaja në vendin tonë.
Sipas tij, në ndërtesat e ngjashme që janë ndërtuar më herët në këtë lagje nga qeverie serbe, janë vendosur njerëz të cilët askush nuk i ka parë më herët, që do të thotë se janë nga vende të ndryshme të ish-Jugosllavisë. /KP/
