Dy aeroplanë kinezë kanë qenë vetëm sekonda larg një përplasjeje të rrezikshme në hapësirën ajrore të Rusisë, pasi një aeroplan pasagjerësh i kompanisë Air China ka ndryshuar lartësinë pa leje.
Sipas mediave të huaja, që citojnë burime të Flightradar24, ngjarja ndodhi më 6 korrik, kur fluturimi CA967 i Air China, që po udhëtonte nga Shanghai drejt Milanos, u ngjit papritur nga 10,394 metra në 10,973 metra pa ndonjë udhëzim nga kontrolli ajror rus.
Kjo manovër e paautorizuar e afroi rrezikshëm me një aeroplan tjetër, fluturimin CSS128 të SF Airlines, një Boeing 767 mallrash që po fluturonte nga Budapesti drejt qytetit Ezhou në Kinën qendrore. Dy aeroplanët ndodheshin në një distancë kritike prej vetëm 90–120 metrash, ndonëse protokollet ndërkombëtare të aviacionit kërkojnë një distancë vertikale minimale prej 305 metrash (1,000 këmbë) gjatë fluturimit në lartësi të mëdha.
Incidenti ndodhi mbi rajonin malor të Tuvës, në Siberinë jugore, afër kufirit me Mongolinë, dhe u kap nga të dhënat e ndjekjes në kohë reale nga Flightradar24.
Ngjitja e paautorizuar shkaktoi aktivizimin e sistemit të automatizuar për shmangien e përplasjeve në ajër (TCAS) në të dy avionët, duke detyruar pilotët të ndërmarrin manovra emergjente.
Sipas regjistrimeve audio që qarkullojnë në rrjetet sociale kineze, kontrollori rus i trafikut ajror mund të ketë qenë duke komunikuar njëkohësisht me katër aeroplanë dhe ndoshta ka dhënë udhëzime të paqarta. Megjithatë, burimi i këtyre regjistrimeve nuk është konfirmuar dhe autenticiteti i tyre mbetet i pavërtetuar.
Deri më tani, Air China, SF Airlines dhe Autoriteti i Aviacionit Civil të Kinës nuk kanë dhënë asnjë koment publik lidhur me ngjarjen.
Ende nuk është e qartë se pse ekuipazhi i Air China ka ndryshuar lartësinë pa autorizim. Një nga pistat që po hetohet është mundësia e një keqkuptimi me një komandë që ishte e destinuar për një tjetër aeroplan.
Pas incidentit, dy pilotët kinezë kaluan në një frekuencë private dhe komunikuan në gjuhën mandarin. Piloti i SF Airlines shprehu shqetësim serioz, duke e quajtur lëvizjen “shumë të papërshtatshme” dhe pyeti nëse ishte marrë leje për këtë ndryshim.
Nga ana tjetër, piloti i Air China ia atriboi konfuzionin kontrollorit rus, duke thënë se “kishte shumë zhurmë” dhe se ekipi i tij ishte “i hutuar” nga situata. Ai gjithashtu pranoi se do të ishte e nevojshme të dorëzonin një raport zyrtar mbi ngjarjen.
