Nënkryetarja e Sindikatës së Bashkuar të Arsimit, Vjollca Shala, ka shprehur shqetësimin lidhur me largimin e vazhdueshëm të mësimdhënësve dhe nxënësve nga shkollat e Kosovës. Ajo theksoi se emigrimi drejt vendeve evropiane po ndodh për shkak të kushteve më të mira të jetesës dhe pagesave më të larta që ofrohen atje.
Në një intervistë për Ekonomia Online, Shala paralajmëroi se nëse ky trend nuk ndalet, shkollat rrezikojnë të mbesin pa staf arsimor dhe pa nxënës.
“Shumë shqetësuese janë informacionet që po i marrim nga terreni për largimin e nxënësve nga shkollat e Kosovës, por në të njëjtën kohë edhe për largimin e mësimdhënësve nga shkollat e Kosovës. Shumica prej tyre po emigrojnë nëpër Evropë, ngase atje po gjejnë kushte më të mira për jetesë dhe pagesa më të mira për mësimdhënësit. Është shqetësuese një gjë e tillë, ngase shkollat e Kosovës po boshatisen si nga nxënësit, ashtu edhe nga mësimdhënësit,” tha ajo.
Sipas saj, shumë mësimdhënës po mësojnë gjuhën e vendit ku emigrojnë, pasi tashmë kanë përvojën e nevojshme të punës, çka ua lehtëson integrimin profesional jashtë vendit.
“Është shqetësuese, sepse në një të ardhme, nëse vazhdon një ikje e tillë, shkollat tona do të mbesin edhe pa mësimdhënës. Duke analizuar edhe gjendjen politike dhe moskonstituimin e Kuvendit të Kosovës, kjo po shkakton pasiguri si për nxënësit, ashtu edhe për mësimdhënësit,” shtoi Shala.
Ajo gjithashtu kritikoi institucionet shtetërore për mungesën e veprimeve konkrete në përmirësimin e kushteve në sistemin arsimor dhe për vonesat në funksionalizimin e Kuvendit të Kosovës.
“Duke mos pasur siguri në shkollat tona, duke pasur parasysh kushtet e punës dhe pagesat, atje (në vendet evropiane) po gjejnë pagesë më të mirë dhe vlerësim më të mirë. Në të njëjtën kohë, edhe nxënësit me familjet e tyre natyrisht po ikin, ngase po gjejnë kushte më të mira në vende të ndryshme të Evropës. Këtë ikje e ka mundësuar vetë liberalizimi i vizave. Këtë vit, me rastin e liberalizimit, familjarë të ndryshëm po ikin për të provuar jetën e tyre diku në Evropë dhe duke gjetur jetesë më të mirë, natyrisht që po vazhdojnë të jetojnë në ato shtete,” theksoi ajo.
Në vazhdim, Shala përmendi edhe zbatimin e mangët të vendimeve të Gjykatës Kushtetuese për kompensimin e përvojës së punës dhe vonesat në nënshkrimin e kontratës kolektive me Ministrinë e Arsimit.
“Përgjegjës është vetë shteti dhe vetë institucionet që janë përgjegjëse për krijimin e kushteve më të mira, si për nxënësit, ashtu edhe për mësimdhënësit. Tashmë kanë kaluar disa muaj nga mbajtja e zgjedhjeve dhe nuk po arrihet të bëhet konstituimi i Kuvendit. I kemi edhe vendimet e Gjykatës Kushtetuese për përvojën e punës, që kanë të bëjnë me 15 vitet e para të shërbimit. Mësimdhënësve po u paguhen vetëm 0.25% për çdo vit shërbimi, ndërsa Gjykata ka marrë vendim për 0.5%. Rreth katër për qind po dëmtohen në pagë, përballë çmimeve të rritura për jetesë. Kemi edhe rastin e draft-kontratës kolektive, e cila është dashur të nënshkruhet mes Ministrisë së Arsimit dhe SBASHK-ut,” përfundoi Shala.
