Australia ka bërë një hap historik duke u bërë vendi i parë në botë që ndalon përdorimin e mediave sociale për fëmijët nën moshën 16 vjeç. Ndalimi hyri në fuqi në mesnatë dhe zbatohet për platformat më të mëdha globale, përfshirë Facebook, Instagram, X, TikTok, YouTube dhe Snapchat. Sipas ligjit të ri, kompanitë e teknologjisë janë të obliguara të bllokojnë qasjen e fëmijëve nën 16 vjeç ose përballen me gjoba të rënda deri në 49.5 milionë dollarë australianë (33 milionë dollarë amerikanë).
Kryeministri australian, Anthony Albanese, e përshkroi këtë vendim si një moment historik. “Krenaria ime që jam kryeministër i Australisë nuk ka qenë kurrë më e madhe. Kjo është Australia që tregon se mjaft është mjaft”, deklaroi ai. Albanese theksoi se vendimi përbën një ndryshim të thellë social dhe kulturor, i cili pritet të ndikojë edhe përtej kufijve të Australisë dhe të shërbejë si model për vende të tjera.
Të dhënat tregojnë se qindra mijëra adoleshentë australianë janë tashmë aktivë në rrjetet sociale, pavarësisht kufirit zyrtar 13-vjeçar që shumë platforma pretendojnë se zbatojnë. Sipas statistikave, rreth 440 mijë të rinj të moshës 13–15 vjeç përdorin Snapchat, 350 mijë Instagram, 325 mijë YouTube dhe mbi 200 mijë TikTok. Këto shifra, sipas autoriteteve, e bëjnë të domosdoshëm një mekanizëm më të fortë mbrojtjeje për fëmijët.
Komisioneri i Sigurisë Elektronike i Australisë ka listuar një numër platformash që ndalohen për përdoruesit nën 16 vjeç, përfshirë Facebook, Instagram, Reddit, TikTok, Snapchat, Threads, Twitch, X dhe YouTube. Megjithatë, disa shërbime të mesazheve si WhatsApp dhe Facebook Messenger nuk përfshihen në ndalim. Po ashtu, platforma të tjera si Discord, GitHub, Google Classroom, Pinterest, Steam, YouTube Kids dhe LEGO Play mbeten të lejueshme.
Me ligjin e ri, ndëshkimet nuk synojnë fëmijët apo prindërit e tyre, por vetë platformat që nuk zbatojnë rregullat. Komisioneri i Sigurisë Elektronike ka paralajmëruar se do të monitorojë rreptësisht zbatimin e ligjit dhe do të përdorë kompetencat e dhëna nga Akti i Sigurisë Online për të siguruar pajtueshmërinë.
Sipas autoriteteve australiane, ky hap synon të mbrojë mirëqenien mendore dhe sigurinë e fëmijëve, duke vendosur një standard të ri global për mbrojtjen e të miturve në internet.
