“Ndal Drejtësisë Selektive”, “SOPOT2” dhe “Ndal proceseve të montuara” ishin vetëm disa nga parullat që u thanë nga familjarët e të akuzuarve për rastin “Monstra”, të përkrahur nga qytetarë shqiptarë të Shkupit, në një protestë para Prokurorisë Publike.
Qytetarët e tubuar shprehën pakënaqësinë ndaj analizës së prokurores për të afërmit e tyre, dhe thanë se fjalët e saj në seancën e fundit gjyqësore nuk shkojnë në të mirë të vendit dhe bashkëjetesë.
“Ne nuk jemi Al Kaeda, ne nuk jemi terroristë, ne nuk jemi vrasës. Rastet janë të montuara, nuk është ky rasti i parë por shpresoj të jetë i fundit”, tha Bedri Ajdari, vëllai i Fejzi Azirit.
Njëri nga familjarët e të akuzuarve u bëri apel mediave maqedonase që të jenë korrekte gjatë raportimit, pasi urrejtja mund të sjellë destabilizim të vendit.
“Të kenë kujdes me titujt që i publikojnë pasi shumë lehtë këtu mund të kthehet atmosfera sikur në Bejrut apo Vukovar. Shumë lehtë mund të përshkallëzojë situata. Me këtë rast, apeloj që të keni kujdes dhe të jenë korrekt në profesionin tuaj”, u shpreh Ajdari. /Alsat-M/
