Në Shqipëri është zhvilluar këtë të shtunë ceremonia zyrtare e prezantimit të ministrit të ri të Mbrojtjes, Ermal Nufi. Gjatë ceremonisë, ish-ministri i Mbrojtjes, Pirro Vengu, i dorëzoi zyrtarisht detyrën pas përfundimit të mandatit të tij në krye të këtij institucioni.
Në fjalën e tij gjatë ceremonisë, Vengu theksoi se përvoja në Ministrinë e Mbrojtjes i ka dhënë mësime të rëndësishme mbi përgjegjësinë dhe përkushtimin që kërkon ky sektor.
Ai u shpreh se angazhimi i tij i ri si deputet i Vlorës nuk e largon nga misioni i sigurisë kombëtare, pasi sipas tij siguria e vendit mbrohet edhe përmes vendimmarrjes politike dhe institucioneve të tjera shtetërore. Vengu falënderoi gjithashtu për mbështetjen kryeministrin Edi Rama, duke theksuar se fryma e punës në këtë ministri do ta shoqërojë edhe në detyrën e re.
“Puna me njerëzit me uniformë më ka mësuar përulësinë dhe më ka treguar se autoriteti nuk buron nga zëri i lartë, por nga përgjegjësia e heshtur. Lufta është gjithmonë tragjedi, por përgatitja është e domosdoshme, sepse për të ndalur armët duhen armë”, u shpreh Vengu.
Ai shtoi se po ia dorëzon detyrën një miku dhe bashkëpunëtori të mirë, duke theksuar se institucioni është i fortë dhe se Shqipëria mbetet në duar të sigurta.
“Kjo ministri e di shumë mirë çmimin e përgjegjësisë. Pas çdo uniforme ka një histori dhe pas çdo plage ka një qenie njerëzore që meriton të dëgjohet. Institucioni është i fortë, Shqipëria është në duar të sigurta dhe misioni vazhdon”, deklaroi ai.
Nga ana tjetër, ministri i ri i Mbrojtjes, Ermal Nufi, theksoi se do të punojë në bashkëpunim të ngushtë me të gjitha strukturat për të forcuar më tej kapacitetet e sigurisë dhe mbrojtjes së vendit.
Ai nënvizoi se institucionet ndërtohen mbi vazhdimësinë dhe respektin për punën e atyre që kanë shërbyer më parë, duke vlerësuar kontributin e Forcave të Armatosura.
“Strategjia ndërtohet çdo ditë nga njerëzit që punojnë, nga burrat dhe gratë që veshin uniformën dhe nga komandantët që marrin vendime të vështira. Sot dua të shpreh respektin tim më të thellë për çdo pjesëtar të Forcave të Armatosura”, tha Nufi.
Në fund të fjalës së tij, ai theksoi se shërbimi ndaj atdheut është një detyrë që kërkon sakrifica, por njëkohësisht është edhe një privilegj që mbart krenari.
“Nuk vij në këtë ministri për të punuar vetëm. Do të bashkëpunoj me të gjithë për të forcuar më tej kapacitetet e sigurisë së këtij vendi”, përfundoi ministri i ri i Mbrojtjes.
