Kancelarja gjermane Angela Merkel ka dënuar aktivitetet e organizatës ekstreme të krahut të djathtë “Patriotëve evropian kundër islamizimit të perëndimit” (PEGIDA), duke thënë se zemrat e tyre janë të ftohta dhe të mbushura me urrejtje, raporton Anadolu Agecny (AA).
Merkel në mesazhin e Vitit të Ri të cilin e përcolli përmes televizionit, dënoi lëvizjen anti-Islame për diskriminim racor dhe fetar pa përmendur emrin e saj. Ajo i bëri thirrje popullit të vendit të saj që mos ti bashkëngjiten kësaj lëvizje. “Të hënën mblidhen nën sloganin ‘Ne jemi popull’, për deri sa flasin kështu ata në të vërtet përcjellin mesazhin: ‘Ju për shkak të ngjyrës dhe fesë tuaj nuk i përkisni këtij vendi’. Ftoj të gjithë ata që marrin pjesë në këto protesta të mos e bëjnë këtë. Sepse zemrat i kanë të mbushura me paragjykime, të ftohta dhe me urrejtje,” tha Merkel.
Duke dënuar armiqësinë ndaj të huajve, Merkel tha se të huajt i nevojiten Gjermanisë, e cila ka një popullsi në plakje dhe e cila duhet të jetë në hap me revolucionin dixhital. “Njerëzit që vijnë si emigrantë në Gjermani, është në të mirën tonë,” tha ajo. Kancelarja gjermane në mesazhin e Vitit të Ri preku temën e politikës së jashtme, duke theksuar se vendi i saj do të vazhdojë të ofrojë mbështetje në luftën kundër organizatës terroriste ISIL.
“Kjo organizatë terroriste vazhdon përpjekjet e saj që me dhunë të qeverisë Sirinë dhe Irakun verior në të njëjtën kohë është edhe kërcënim për vlerat tona këtu. Bota e lirë është kundër kësaj,” tha Merkel.
Kujtojmë se PEGIDA, të cilën e themeloi Lutz Bachman, i dënuar për vjedhje, plagosje dhe përdorim të drogës, protestën e parë e organizuan më 20 tetor në Dresden. Protesta e parë u organizua nga 12 person përmes platformave sociale, ndërsa thirrjes për protesta ju përgjigjën rreth 350 persona, ashtu që protestës së 27 tetorit ju përgjigjën 500 persona, 3 nëntor rreth 1000, 17 nëntor 3200, ndërsa më 24 nëntor kishte rreth 5500 protestues. Mbështetja e kësaj lëvizje anti-islamike në dhjetor është rritur në mënyrë të ndjeshme, ashtu që në protestën e fundit më 22 dhjetor, ka pasur rreth 17.500 njerëz.
