Presidenti algjerian Abdelmadjid Tebboune tha se “masakrat e tmerrshme” të kryera gjatë epokës koloniale franceze në Algjeri “nuk mund të harrohen”, transmeton Anadolu Agency (AA).
Në një mesazh për 77-vjetorin e masakrës së 8 majit 1945 të kryer nga ushtria koloniale franceze kundër demonstruesve algjerianë, Tebboune tha se gjakderdhja ishte një pikë kthese në historinë e Algjerisë.
Masakra e 8 majit 1945 ishte masakra më e madhe dhe më e shëmtuar e kryer nga Franca në një ditë të vetme, ku shifrat zyrtare algjeriane vlerësojnë se rreth 45.000 algjerianë u vranë duke kërkuar pavarësinë e vendit të tyre.
Algjeria përfaqëson shembullin më të fundit dhe më të përgjakshëm të historisë koloniale të Francës në kontinentin afrikan.
Përafërsisht 1,5 milion algjerianë u vranë dhe miliona të tjerë u zhvendosën në luftën tetëvjeçare për pavarësi që filloi në vitin 1954.
Për vite me radhë, Algjeria ka kërkuar që Franca të njohë dhe të kompensojë krimet e saj të kryera kundër popullit algjerian gjatë periudhës koloniale franceze midis viteve 1830 dhe 1962.
Parisi nuk i ka kërkuar asnjëherë zyrtarisht falje Algjerisë si shtet për politikat e saj koloniale.
