“Tesla Convoy” ka për synim që të jetë promotor për startup-et. Një fushatë 6 ditore nëpër qendrat kryesore në Ballkan, solli makinën elektrike Tesla Model S edhe në Tiranë dhe Prishtinë ditën e djeshme. Qëllimi i kësaj fushate është të bashkojë dhe lidhë së bashku inovatorët, sipërmarrësit, dhe investitorët e frymëzuar nga puna e Nikola Tesla-s me kompani që duan të përdorin patentat e Tesla Motors të cilat u bënë të disponueshme nga themeluesi Elon Musk kohët e fundit. Diskutimet kyçe ishin zhvillimi i qendrave (stacioneve) të ngarkimit të makinës elektrike dhe burimeve të rinovueshme të energjisë.
Ideja e fushatës “Tesla Convoy” u formua gjatë një konference mbajtur në Smiljan, vendlindja e Nikola Tesla, dhe organizohet me sezone për të ndihmuar në ndërtimin e promotorëve të rinj të biznesit dhe ka qëllim të tërheqë kompani dhe startup-e në zonat ku shtrihej puna e shkencëtarit të famshëm. Tesla Convoy kaloi edhe nëpër qytete të tjera si: Zagrebi, Beogradi, Shkupi, Tetova, Podgorica, Dubrovniku dhe Spliti përgjatë ditëve 18 – 24 shator. Mbyllja do të bëhet në Zagreb.
Dy konkurse për inovatorët
Fushata do të promovojë dy konkurse në organizimin e tyre. Konkursi Tesla Next Thing do të shpërblejë inovacionet më të mira me një çmim prej 1000 Euro, ndërsa 5 idetë e biznesit më të mira do të marrin një suport me vlerë 5,000 Euro në formë trajnimi.
Konkursi i dytë është dedikuar inovatorëve dhe dizajnerëve dhe quhet Design your next Tesla EV. Dizajni më i mirë do të dërgohet për tek zyrat qendrore të Tesla Motors dhe Qendrën Shkencore të Tesla në SHBA. Fituesi do të shpërblehet me një çmim prej 1000 Euro./PCWorld
