Me rënien e natës në Oxford Circus, një nga zonat më të shtrenjta dhe më të frekuentuara të blerjeve në botë, rrugët e qendrës së Londrës marrin një pamje krejt tjetër. Pas mbylljes së dyqaneve luksoze dhe përfundimit të orëve të ngarkuara të shoppingut, persona të pastrehë shtrihen në hyrje dyqanesh dhe nën dritat e reklamave, duke nxjerrë në pah kontrastin e fortë mes pasurisë së qytetit dhe varfërisë në rritje, raporton Anadolu.
Pamjet nga zemra e kryeqytetit britanik pasqyrojnë një realitet shqetësues: rrugët që ditën simbolizojnë luksin dhe konsumin, natën shndërrohen në strehë të përkohshme për qindra njerëz pa çati mbi kokë. Sipas ekspertëve, rritja e pastrehësisë lidhet drejtpërdrejt me qiratë e larta, mungesën e banesave të përballueshme dhe koston gjithnjë në rritje të jetesës.
Një raport i fundit, “Homelessness Monitor England 2025”, i publikuar nga organizata bamirëse britanike Crisis, paralajmëron se pastrehësia në Angli është rritur ndjeshëm gjatë vitit të kaluar. Sipas raportit, numri i personave që flenë në rrugë është rritur me 20 për qind, duke arritur në 4.667 persona, pothuajse dyfish më shumë krahasuar me nivelin më të ulët gjatë pandemisë COVID-19.
Raporti thekson se më shumë se gjysma e personave që flenë në rrugë në Londër janë shtetas jobritanikë, çka lidhet me rritjen e kërkesave për azil dhe vonesat në përpunimin e tyre. Vetëm gjatë vitit 2024, rreth 330 mijë familje janë vlerësuar nga autoritetet lokale si të pastreha ose në rrezik për t’u bërë të tilla.
Situata në Londër paraqitet edhe më alarmante: rastet e personave në rrezik janë rritur me 7 për qind, ndërsa numri i atyre tashmë të pastrehë me 27 për qind. Studimi vëren gjithashtu rritje të ndjeshme të pastrehësisë si pasojë e dëbimeve nga akomodimi i azilit, lirimeve nga burgjet dhe daljes nga institucionet shëndetësore.
Raporti përfundon se sistemi i trajtimit të pastrehësisë në Angli është nën presion të jashtëzakonshëm, me kapacitete të kufizuara dhe gjithnjë e më pak zgjidhje afatgjata për njerëzit në nevojë.
