Një auditim i brendshëm në Byronë Kosovare të Sigurimit (BKS) ka zbuluar një skandal financiar që kap vlerën mbi 1 milion euro, me pagesa të kryera jashtë procedurave zyrtare dhe pa dokumentacion bazë. Raporti lidhet me periudhën kur institucioni drejtohej nga ish-drejtori ekzekutiv Sami Mazreku, i cili më vonë u përjashtua për pesë vjet nga sektori i sigurimeve.
Sipas dokumentit të siguruar , gjatë viteve 2022–2023 janë kryer gjithsej 166 pagesa të paautorizuara, me vlerë totale 1,043,284 euro. Auditimi thekson se shumica e këtyre pagesave nuk figurojnë në databazën zyrtare të dëmeve të BKS-së, ndërsa mungojnë edhe dokumente thelbësore si raportet e policisë, vendimet e komisioneve të brendshme dhe ekspertizat profesionale.
“Nuk mund të përcaktohet nëse këto fonde janë përdorur për dëme reale apo për qëllime të tjera”, thuhet në raport.
Hetimi tregon se një pjesë e këtyre mjeteve është shpërndarë për 43 persona fizikë dhe një kompani, pa kaluar fare nëpër sistemin e menaxhimit të dëmeve. Menaxhmenti aktual ka pranuar se Departamenti i Financave nuk i ka marrë urdhërpagesat dhe se përfituesit nuk figurojnë në sistem si palë që kanë kërkuar kompensim.
Auditimi ka gjetur edhe shkelje shtesë serioze, përfshirë:
- kompensime të dyfishta për njëjtin aksident;
- mungesë të raporteve origjinale të policisë në të paktën 14 raste;
- raste ku shkalla e fajësisë është ndryshuar nga 50% në 100% pa arsyetim profesional, duke rritur ndjeshëm pagesat.
Raporti rekomandon nisjen e procedurave penale, duke lënë të nënkuptohet se mund të jenë shkelur ligjet e sigurimeve, si dhe ekziston rrezik për shpëlarje parash.
Rasti tashmë është dorëzuar në prokurori, por ende nuk është bërë e ditur se cili prokuror do ta marrë në hetim.
