Komiteti Olimpik Ndërkombëtar nëpërmjet uebfaqe zyrtare e konfirmoi pranimin e përkohshëm të Kosovës.
Në njoftim thuhet se sot Komiteti Ekzekutiv i IOC-së e pranoi përkohësisht Kosovën, e cila me drejta të plota do të pranohet në sesionin e radhës, që do të mbahet në dhjetor, në Monako, raporton Zëri.
IOC deklaron se Komiteti Olimpik i Kosovës (KOK) i ka plotësuar kushtet për t’u anëtarësuar, pasi ka nën ombrellë 30 Federata sportive, 13 prej tyre olimpike, shkruan Zëri. Nga to, të ndërkombëtarizuara plotësisht janë gjashtë, kurse shtatë tjera janë ndërkombëtarizuara, por me kufizime.
Në njoftim thuhet se IOC e ka pranuar Kosovën, duke e marrë parasysh Kartën Olimpike, sipas të cilës “shteti duhet të jetë i pavarur dhe i njohur ndërkombëtarisht”.
“Kosova njihet si shtet prej 108, nga 193 shtete sa ka OKB-ja”, thuhet në njoftim.
“Ky vendin është marrë në interes të atletëve të Kosovës. Kjo do t’ua mundësoj atyre pjesamrrjen në kualifikime për Lojërat Olimpike ‘Rio 2016’”, theksohet në komunikatën zyrtare. /Zëri