I dërguari i posaçëm i Shteteve të Bashkuara, Steve Witkoff, ka mbërritur në Moskë, vetëm pak ditë para afatit të vendosur nga Shtëpia e Bardhë që Rusia të arrijë një marrëveshje paqeje me Ukrainën, ose përndryshe të përballet me sanksione ekonomike.
Presidenti Donald Trump ka paralajmëruar se do të vendosë sanksione ndaj Rusisë nëse Moska nuk pranon një armëpushim përpara ditës së premte.
Shtëpia e Bardhë nuk ka dhënë detaje të sakta për masat që planifikon të marrë, por më herët Trump ka kërcënuar me vendosjen e “tarifave dytësore” ndaj partnerëve tregtarë të Rusisë, përfshirë Indinë dhe Kinën.
Pas mbërritjes në Moskë të mërkurën, Witkoff u prit nga përfaqësuesi i posaçëm presidencial rus, Kirill Dmitriev, sipas agjencisë shtetërore ruse të lajmeve, TASS.
Dmitriev ka luajtur një rol kyç në bisedimet e drejtpërdrejta për paqe ndërmjet Rusisë dhe Ukrainës në Stamboll gjatë muajve të fundit, si dhe në kontaktet ndërmjet zyrtarëve rusë dhe amerikanë.
Zëdhënësi i Kremlinit, Dmitry Peskov, e mirëpriti vizitën e Witkoff-it të hënën. “Ne i konsiderojmë (bisedimet me Witkoff-in) të rëndësishme, përmbajtësore dhe shumë të dobishme,” tha ai.
Kremlini nuk ka konfirmuar nëse Witkoff do të takohet me presidentin Vladimir Putin gjatë qëndrimit të tij në Rusi.
Kur gazetarët e pyetën Trump-in të hënën se cili ishte mesazhi i Witkoff-it për Moskën dhe nëse kishte diçka që Rusia mund të bënte për të shmangur sanksionet, ai u përgjigj: “Po, të arrijnë një marrëveshje ku njerëzit të mos vriten më.”
Witkoff, një miliarder i industrisë së pasurive të paluajtshme, ka pasur disa takime të gjata me Putinin më herët. Ai nuk kishte përvojë diplomatike përpara se t’i bashkohej ekipit të Trump-it në janar, dhe kritikët e kanë përshkruar si të papërshtatshëm për një detyrë të tillë.
Tre raunde të mëparshme bisedimesh për paqe në Stamboll, me qëllim ndërprerjen e luftimeve ndërmjet Rusisë dhe Ukrainës, kanë dështuar të sjellin përparim të dukshëm.
Putin, i cili vazhdimisht ka refuzuar thirrjet për armëpushim, deklaroi të premten se ai dëshiron paqe, por se kërkesat e tij për t’i dhënë fund ofensivës gati trevjeçare e gjysmë mbeten të pandryshuara. Moska kërkon që Ukraina të heqë dorë nga territore të tjera dhe të braktisë mbështetjen nga Perëndimi, përfshirë synimet për anëtarësim në NATO.
Nga ana tjetër, Kievi po bën thirrje për një armëpushim të menjëhershëm, ndërsa presidenti ukrainas Volodymyr Zelenskyy javën e kaluar u bëri apel aleatëve të tij që të shtyjnë për një “ndryshim regjimi” në Moskë.
