Andreas Schockenhoff, Hans Joachim Falenski dhe Johann Wadephul, deputetë të Bundestagut gjerman të partisë së kancelares Angela Merkel (CDU), më 10 korrik do të shkojnë në Beograd për një vizitë dyditore, raporton gazeta serbe Danas duke iu referuar burimeve të saj diplomatike në Berlin.
Sipas këtyre burimeve, ata do të kërkojnë vazhdimin e dialogut të Brukselit. Këtë e thotë edhe Bodo Weber, ish bashkëpunëtor i Këshillit për Politik dhe Demokratizim në Berlin.
“Besoj se deputetët gjermanë në Beograd do të insistojnë që dialogu, pas një pauze të shkaktuar nga zgjedhjet në Serbi, në shtetet e BE-së dhe në Kosovë, duhet të ketë dinamikë të re. Po ashtu, duke ditur se Schockenhoff është kritikues i Rusisë së Putinit dhe intervenimit rus në Ukrainë, do të gjejë fjalë të qarta për raportin e kujdesshëm të Beogradit zyrtar dhe të mënyrës së veçantë të ‘diplomacisë paralele’ nëmës të BE-së dhe Euroazisë”, thotë ai, transmeton Telegrafi.
Andreas Schockenhoff, zyrtar i lartë i CDU-së, është i njohur për paraqitjen e shtatë pikave të cilat Gjermania pret që Serbia t’i përmbush në rrugën e saj drejt BE-së, e ku futet edhe marrëveshja për normalizimin e raporteve me Kosovën.
Po ashtu, edhe Falenski disa herë e ka vizituar Beogradin, ku ka cekur pranimin e ndërsjellët dhe karrigen e Kosovës në OKB. /Telegrafi/