Një ngjarje tragjike ka ndodhur në fshatin Beqiq të Vushtrrisë, ku një grua rreth 53 vjeç është gjetur pa shenja jete. Rasti është raportuar në orën 01:30, dhe menjëherë pas kësaj, policia ka nisur hetimet për të zbardhur shkaqet e vdekjes.
Zëdhënësi i Policisë së Kosovës për rajonin e Mitrovicës, Avni Zahiti, konfirmoi lajmin për mediat. Sipas tij, rasti po hetohet si “vdekje e dyshimtë”. Njësitë policore kanë dalë në vendin e ngjarjes dhe ekipi mjekësor ka konstatuar vdekjen e viktimës.
Me urdhër të prokurorit të shtetit, trupi i pajetë i gruas është dërguar në Institutin e Mjekësisë Ligjore në Prishtinë. Autopsia pritet të përcaktojë shkaqet e sakta të vdekjes, duke hedhur dritë mbi rrethanat e kësaj ngjarjeje.
