Agjencia e OKB-së për refugjatët palestinezë (UNRWA) është detyruar të shkurtojë shërbimet e saj me rreth 20 për qind për shkak të një krize të thellë financiare, ka deklaruar Komisioneri i Përgjithshëm i agjencisë, Philippe Lazzarini, duke u bërë thirrje vendeve donatore që mbështetjen politike ta shndërrojnë në kontribute konkrete financiare.
Duke folur për Anadolu në Bruksel, Lazzarini theksoi se UNRWA po përballet me një mungesë fondesh që tejkalon 200 milionë dollarë, çka e bën të pamundur mbajtjen e plotë të shërbimeve në të gjithë rajonin. Sipas tij, agjencia nuk ka më kapacitet të përballojë shpenzimet bazë pa mbështetje urgjente financiare nga komuniteti ndërkombëtar.
Duke iu referuar situatës humanitare në Gaza, Lazzarini sqaroi se rihapja e pikës kufitare Rafah është shumë e kufizuar dhe nuk përbën një korridor real furnizimi. Aktualisht, vetëm 50 persona lejohen të kalojnë dhe pika është e hapur vetëm për këmbësorë, nën kufizime të rrepta izraelite.
Ai nënvizoi se, pavarësisht marrëveshjes së armëpushimit që hyri në fuqi më 10 tetor 2025, realiteti në Gaza mbetet dramatik. Banorët vazhdojnë të luftojnë për mbijetesë, pa strehim të mjaftueshëm, me kushte të rënda shëndetësore dhe pasojat e një dimri shumë të ashpër. “Kjo është një luftë e përditshme për mbijetesë që ende vazhdon”, theksoi ai.
UNRWA, e financuar përmes kontributeve vullnetare të shteteve anëtare të OKB-së, ka qenë që nga viti 1950 agjencia kryesore që ofron ndihmë humanitare për refugjatët palestinezë, përfshirë ushqim, kujdes shëndetësor, arsim dhe strehim. Aktualisht, ajo mbështet rreth 5.9 milionë refugjatë palestinezë.
Gjatë më shumë se 75 viteve të veprimtarisë së saj, objektet e UNRWA-s janë shënjestruar vazhdimisht nga sulmet izraelite, me sasi të mëdha ushqimesh dhe ilaçesh të shkatërruara. Në tetor 2024, parlamenti izraelit ndaloi aktivitetet e UNRWA-s në Izrael dhe Kudsin Lindor të pushtuar, duke u bazuar në akuza për përfshirjen e disa punonjësve në ngjarjet e 7 tetorit 2023.
Pezullimi i fondeve nga disa vende donatore dhe bastisja e selisë së UNRWA-s në Kudsin Lindor më 20 janar e kanë thelluar më tej krizën, duke ndikuar drejtpërdrejt në jetën e rreth 2.5 milionë refugjatëve në territoret palestineze.
