TIRANË, 19 Maj – Rrjeti i aktivistëve “Palestina e Lirë”, në kuadër të fushatës ndërkombëtare “Freedom Flotilla Coalition” dhe “Thousand Madleens to Gaza”, ka njoftuar bllokimin e një anijeje humanitare nga forcat izraelite dhe arrestimin e disa aktivistëve, mes të cilëve ndodhet edhe qytetari shqiptar, Baki Goxhaj.
Për të kundërshtuar këtë ndalim dhe për të shprehur solidaritetin me popullin palestinez, organizatorët kanë thirrur një protestë qytetare ditën e sotme, më 19 Maj, në orën 18:00, në Sheshin “Skënderbej” në Tiranë.
Sipas deklaratës së shpërndarë nga lëvizja, anija “Kyriakos”, pjesë e flotiljes humanitare që kishte si qëllim të thyente në mënyrë paqësore bllokadën e Gazës, është ndaluar në Mesdhe nga forcat izraelite. Aktivistët që ndodheshin në bord, të cilët mbanin me vete “një mesazh solidariteti, paqeje dhe lirie për popullin palestinez”, raportohet se janë vënë në pranga.
Paralele me historinë e shqiptarëve
Në thirrjen e tyre për mobilizim, organizatorët kanë lidhur kauzën palestineze me të kaluarën historike të kombit shqiptar. “Ne shqiptarët e dimë çfarë do të thotë pushtimi, spastrimi etnik dhe padrejtësia. E kemi përjetuar në Çamëri, në Kosovë dhe në historinë tonë,” theksohet në komunikatë, duke shtuar se përballë krizës humanitare dhe atij që ata e quajnë gjenocid në Gaza, nuk mund të qëndrohet në heshtje.
Gjithashtu, aktivistët theksojnë se Mesdheu duhet të jetë një det që bashkon historitë dhe kërkimin për liri, duke dënuar ashpër militarizimin e tij nga Izraeli dhe politikat kufizuese të “Fortesës Evropë”.
Thirrje urgjente institucioneve shqiptare
Në përfundim të njoftimit, lëvizja i është drejtuar me një kërkesë urgjente autoriteteve shtetërore në Shqipëri. Ata u bëjnë thirrje institucioneve dhe ambasadës shqiptare që të reagojnë menjëherë për të garantuar mbrojtjen dhe sigurinë e qytetarit shqiptar Baki Goxhaj, si dhe të gjithë aktivistëve të tjerë të huaj të ndaluar gjatë këtij misioni.
Protesta e sotme në kryeqytet do t’i bashkohet jehonës së nismave globale në mbrojtje të të drejtave të njeriut dhe kundër bllokadës në territoret palestineze.
