Ndërmarrja Trepça ka shënuar një fitore të plotë ligjore në mbrojtje të pronës publike, pas një aktgjykimi të Gjykatës Themelore në Mitrovicë.
Me Aktgjykimin C.nr.91/2023, gjykata ka konfirmuar në mënyrë të qartë dhe përfundimtare të drejtën e pronësisë së Trepçës, duke urdhëruar lirimin e menjëhershëm dhe kthimin e pronës në posedim të ligjshëm të ndërmarrjes. Ky vendim pasqyron respektimin e ligjit dhe përkujdesjen për interesin publik, duke i dhënë fund uzurpimit të pronës që ka zgjatur mbi 20 vjet. Gjatë kësaj periudhe, ishin ndërmarrë veprime për tjetërsimin e pronës në kundërshtim me ligjin dhe me interesin e qytetarëve.
Si rezultat i këtij vendimi gjyqësor, Trepça ka rikthyer në posedim pasuri publike me vlerë mbi 1.35 milion euro, duke forcuar kështu pozitën e ndërmarrjes dhe sigurinë e pronës publike në vend.
Nga Trepça vlerësojnë se ky aktgjykim përbën një hap të rëndësishëm në forcimin e sundimit të ligjit, mbrojtjen e pronës publike dhe parandalimin e uzurpimeve të kundërligjshme. Vendimi është gjithashtu një dëshmi e angazhimit të vazhdueshëm të ndërmarrjes për të ruajtur pasuritë publike dhe për të mbrojtur interesat e qytetarëve.
Në njoftim është theksuar se ky sukses reflekton edhe puna profesionale dhe përkushtimi i Zyrës Ligjore të Trepçës, e cila vazhdimisht angazhohet për mbrojtjen e interesave ligjore të ndërmarrjes dhe për garantimin e sigurisë së pasurisë publike të Republikës së Kosovës.
Ky vendim gjyqësor nuk është vetëm një fitore për Trepçën, por edhe një mesazh i qartë për respektimin e ligjit dhe mbrojtjen e pronës publike në të gjithë vendin, duke dërguar një sinjal të fortë kundër uzurpimeve dhe veprimeve të paligjshme mbi pasuritë që i takojnë qytetarëve.
