Dhunës në shkollë iu nënshtrua një nxënës 13 vjeçar në Baicë të Drenasit. Atë e rrahu keq arsimtari i matematikës. Me rastin po merren hetuesit policor dhe zyrtarë të Ministrisë së Arsimit.
Mësuesi Izet Demiçi e rrahu Mentor Lekun ditën e hënë në orën e matematikës që po zhvillohej në një nga klasat e gjashta të shkollës “Migjeni” në Baicë të Drenasit.
13 vjeçari rrëfen për Klan Kosovën ngjarjen.
“Ditën e premte i kum marrë leje me shku me falë xhumanë edhe s’mka lshu. Ditën e hane, dje, më pyeti tani ma qiti 2’sh. Unë dashta me shku te drejtori, ai më kapi për krahu edhe më tha rr në klasë, tani ma kish qitë 2’sh. Ma ka qitë tani 1’sh edhe vërejtje në ditar, dhe më ka rreh”, tha Mentori.
Ai u dërgua në spital menjëherë pas incidentit pasi lëndimet që mori nuk ishin të lehta.
Ngjarjen e përjetoi rëndë edhe nëna e nxënësit e cila kishte rritur fëmijët në mungesë të bashkëshortit i cili kishte vdekur më herët.