Në prag të finales historike ndaj Turqisë, Kombëtarja e Kosovës ka marrë një mesazh të veçantë mbështetjeje nga Joe DioGuardi, ish-kongresmen amerikan dhe një nga zërat më të njohur në mbështetje të çështjes shqiptare.
Përmes një mesazhi emocional, DioGuardi rikujtoi përpjekjet e përbashkëta në Uashington për të drejtat e shqiptarëve, duke e krahasuar suksesin aktual sportiv me qëndresën historike të popullit të Kosovës.
“Kam qenë në Uashington me ju duke luftuar për të drejtat e popullit shqiptar. Do të doja shumë të isha në ndeshje me ju, por të gjithë e dinë se çfarë keni arritur. Keni bërë diçka që është thuajse e pamundur; keni mposhtur shtete të mëdha”, thuhet në mesazhin e tij.
Ai theksoi se kjo përballje ka rëndësi të madhe jo vetëm sportive, por edhe për imazhin e shqiptarëve në botë, duke vlerësuar arritjet e deritanishme të ekipit.
Në mesazhin e tij, DioGuardi përmendi edhe figurën e Gjergj Kastrioti Skënderbeu, duke e lidhur frymën e ekipit me historinë e qëndresës dhe sakrificës.
“Ju keni shpirtin dhe një histori të tërë duke luftuar përballë vështirësive të mëdha. Mjafton të mendosh çfarë ka arritur Skënderbeu. Do të doja të isha me ju kundër Turqisë, por mezi pres t’ju takoj në Amerikë kur të ktheheni me fitore”, përfundoi ai.
Ndeshja ndërmjet Kosovës dhe Turqisë zhvillohet këtë të marte nga ora 20:45 në stadiumin Fadil Vokrri.
