Ekspertët e OKB-së: Veprimet e Epstein mund të përbëjnë krime kundër njerëzimit
Miliona dokumente të lidhura me pedofilin e ndjerë, Jeffrey Epstein, tregojnë për ekzistencën e një “ndërmarrjeje kriminale globale” që ka kryer veprime të cilat mund të përmbushin pragun ligjor të krimeve kundër njerëzimit.
Këtë e konfirmoi një panel ekspertësh të pavarur të emëruar nga Këshilli i Kombeve të Bashkuara për të Drejtat e Njeriut, të cilët analizuan dokumentet e publikuara nga Departamenti amerikan i Drejtësisë.
Sipas ekspertëve, krimet e përshkruara në dosje janë kryer në një kontekst racizmi, korrupsioni dhe mizogjinie ekstreme, duke reflektuar një nivel të thellë dehumanizimi ndaj grave dhe vajzave.
“Shkalla, natyra, karakteri sistematik dhe shtrirja ndërkufitare e këtyre krimeve ndaj grave dhe vajzave janë aq serioze sa që disa prej tyre mund të arrijnë në mënyrë të arsyeshme pragun ligjor të krimeve kundër njerëzimit”, thuhet në deklaratën e panelit, raportoi Reuters.
Thirrje për hetim të pavarur
Ekspertët theksuan se pretendimet e përfshira në dosje kërkojnë një hetim të pavarur, të thelluar dhe të paanshëm, si dhe një analizë institucionale për të kuptuar se si ka qenë e mundur që krime të tilla të kryhen për një periudhë kaq të gjatë pa ndërhyrje efektive.
Ligji i miratuar nga Kongresi amerikan në nëntor, me mbështetje të gjerë dypartiake, kërkon publikimin e të gjitha dosjeve të lidhura me Epstein.
Shqetësime për mbrojtjen e viktimave
Paneli i OKB-së shprehu shqetësim edhe për shkelje serioze në respektimin e procedurave dhe për redaktimin e dobët të dokumenteve, që ka çuar në zbulimin e informacioneve të ndjeshme për viktimat.
Sipas dokumenteve të publikuara deri më tani, janë identifikuar më shumë se 1200 viktima.
Publikimi i dosjeve ka nxjerrë në pah gjithashtu lidhjet e Epstein me figura të njohura nga politika, financa, akademia dhe biznesi – si para ashtu edhe pasi ai u deklarua fajtor në vitin 2008 për akuzat për prostitucion, përfshirë ndërmjetësimin e një vajze të mitur.
