Bashkimi Evropian ka konfirmuar se heqja e plotë e masave ndaj Kosovës është çështje javësh, sapo të përmbyllen procedurat e brendshme administrative në Bruksel. Ky zhvillim shënon një kthesë të rëndësishme në marrëdhëniet mes BE-së dhe Kosovës, pas një periudhe të gjatë bllokadash politike dhe financiare.
Drejtori i Drejtoratit për Zgjerim në Komisionin Evropian, Jan Koopman, bëri të ditur se, përveç masave që tashmë janë hequr pjesërisht, për Kosovën do të lirohen mbi 400 milionë euro në kuadër të Planit të Rritjes për Ballkanin Perëndimor. Sipas tij, aktualisht procesi ndodhet në fazën e programimit dhe kontraktimit, që përfaqëson hapin final për zhbllokimin e plotë të fondeve.
“Ndërmjet programimit dhe kontraktimit, ne në mënyrë efektive do t’i kishim hequr të gjitha masat financiare në javët e ardhshme. Kjo është ajo që ka deklaruar edhe Presidentja e Komisionit Evropian dhe ajo që ne po planifikojmë dhe po zbatojmë në praktikë”, u shpreh Koopman gjatë raportimit në Komitetin për Politikë të Jashtme të Parlamentit Evropian.
Ai theksoi se pozicioni i Kosovës në kuadër të Planit të Rritjes është relativisht i thjeshtë krahasuar me vendet e tjera të rajonit. Sipas tij, pengesa kryesore deri më tani ka qenë mungesa e institucioneve funksionale, çka ka pamundësuar ratifikimin e marrëveshjeve përkatëse që janë parakusht për lirimin e mjeteve financiare.
“Tani shpresojmë që kjo situatë të zgjidhet së shpejti. Pas zgjedhjeve të dhjetorit, presim formimin e shpejtë të qeverisë. Më pas, autoritetet do të mund të finalizojnë dokumentacionin e nevojshëm, i cili është thelbësor për mbrojtjen e buxhetit të BE-së dhe interesave të taksapaguesve evropianë”, tha ai.
Koopman vlerësoi gjithashtu se institucionet kosovare kanë bërë punë intensive në përgatitjen e reformave, shumë prej të cilave janë gati për zbatim të menjëhershëm. Për këtë arsye, sipas tij, Kosova ka mundësi reale të kapë ritmin e vendeve të tjera të Ballkanit Perëndimor, me kusht që ratifikimi i marrëveshjeve të nevojshme të bëhet pa vonesa në Kuvend.
