Komisioni Evropian ka publikuar sot planin e Bashkimit Evropian për mbështetjen financiare të reformave të ndryshme në Ballkanin Perëndimor dhe Turqi për shtatë vitet e ardhshme. Plani financiar i miratuar nga BE-ja vitin e kaluar, kap shifrat e 11 miliardë eurove, nga të cilat 649.5 milionë euro do të shkojnë për realizimin e reformave në Shqipëri, deri në vitin 2020.
Ky plan parashikon që fondet në vendin tonë do të vinë do u shtuar. Gjatë këtij viti janë parashikuar rreth 83.7 milionë euro për realizimin e reformave të kërkuara nga BE-ja, ndërsa gjatë viteve 2018-2020 vendi ynë do të marrë shumën më të madhe rreth 296.3 milionë euro.
Ndërkohë thuajse në të njëjtat shifra do të jetë financimi edhe për zbatimin e reformave edhe për shtetin e Kosovës, ku në total do të marrë 645.5 milionë euro.
Komisionari Evropian për zgjerim Stefan Fyle, e cilësoi këtë si një lajm shumë të mirë për të gjithë vendet e rajonin që aspirojnë integrimin në Bashkimin Evropian.
Sipas tij këto fonde do të japin efektin e tyre në zbatimin e reformave, të cilat do të ndikojnë në përmirësimin e jetës së qytetarëve si dhe në krijimin e urave lidhëse mes vendeve të Ballkanit. “Ky financim është një lajm shumë i mirë për rajonin. Kjo do tu ofrojë mbështetje atyre vendeve me një perspektivë evropiane për zbatimin e reformave që do të ndikojnë drejtpërdrejt qytetarët, të ndihmojë ata të ecin përpara në rrugën e tyre për BE-në dhe për të ndërtuar ura lidhëse me fqinjët e tyre”, tha Fyle.
Në një njoftim për mediat të Komisionit Evropian, thuhet se ndihma financiare do të synojë realizimin e prioriteteve strategjike për vendet që kërkojnë të bëhen pjesë e BE-së. Fushat kyçe përfshijnë qeverisjen dhe reformën e administratës publike, sundimin e ligjit dhe të drejtat themelore, si edhe mbështetjen për rritjen ekonomike dhe konkurrencën.
Ndihmat do të jenë më tepër të orientuara drejt reformave të sektorit kombëtar. Duke siguruar vazhdimësinë e programit të parë IPA, programi i ri IPA ll do të veprojë me procedurë të thjeshtëzuar për të lehtësuar qasjen e financimit për përfituesit, me qëllim që të arrihen rezultate të orientuara dhe të përshtatura me nevojë të veçanta. /Telegrafi/
