Protestat e djeshme kundër racizmit në SHBA ishin më të qeta se një ditë më parë, ndërsa Guvernatori i Missouri-it, Jay Nixon ka dërguar dy mijë trupa të Gardës Kombëtare në mënyrë që mos të përsëriten trazirat dhe shkatërrimi i pronave siç ka ndodhur gjatë protestave një ditë më parë.
Me ardhjen e trupave të reja të Gardës Kombëtare numri i ushtarëve në Ferguson është mbi 2.200, ndërsa me ndihmën e tyre policia ka ndalur qindra demonstrues. Qytetarët janë mbledhur para ndërtesës së departamentit të policisë. Policia kërkoi që turma të shpërndahet, gjë që nuk gjeti përgjigje pozitive. Një veturë policore i është vënë zjarri, ndërsa policia u përgjigj me gaz lotsjellës dhe arrestime.
Përveç Fergusonit, demonstratat janë mbajtur edhe në New York, Washington, Atlanta, Los Angeles dhe Chicago. Demonstrata në këto qytete përfunduan kryesisht në mënyrë paqësore.
Në New York disa qindra qytetarë tentuan të bllokojnë trafikun në Times Square, por policia i parandaloi duke hedhur gaz lotsjellës, ndërsa disa demonstrues edhe u arrestuan.
Po ashtu edhe në Washington disa mijëra qytetarë ishin mbledhur në sheshin Mt. Vernon. Ata gjatë marshimit bllokuan disa udhëkryqe. Ata brohorisnin me parulla “I kam ngritur duart, mos gjuaj”. Në pankarta ishin mbishkrimet: “Nëse nuk ka drejtësi nuk ka as paqe”, “Ngrihuni për vëllaun”, “Stop Racizmit”, ” Edhe jeta e njeriut me ngjyrë është e vlefshme”, “Nëse heshtni, dhe juve do t’ju vrasin” si dhe “Stop terrorit racist policor” .
Grupi “Black Youth Project 100” i cili merret me të drejtat e qytetarëve me ngjyrë në Shtetet e Bashkuara vuri theksin në një studim ku thuhet se çdo 28 orë vritet një qytetar me ngjyrë, si nga policia ashtu edhe struktura tjera të sigurisë.
– Darren Wilson: Detyrën e kam kryer në mënyrë korrekte –
Pasi polici Darren Wilson qëlloi dhe vrau të riun me ngjyrë, trupi gjykues ka marrë vendimin se nuk ka arsye të fortë për fillimin e procesit gjykues. Ky vendim ka shkaktuar zemërim tek qytetarët pas së cilës kanë shpërthyer protesta në mbar vendin.
Wilson theu heshtjen dhe natën e kaluar i’u drejtua opinionit publik përmes kanalit televiziv “ABC”. Ai veprimin e tij e ka arsyetuar, duke thënë se nuk kishte mënyrë tjetër për të parandaluar të riun.
“Unë detyrën time e kam kryer në mënyrë korrekte”, deklaroi Willson duke shtuar se në mënyrë të njëjtë do të kishte vepruar po të ishte fjala edhe për të riun e bardhë.
Tetëmbëdhjetë vjeçari Michael Brown, sipas fjalëve të Wilsonit, ishte i zhvilluar dhe e sulmoi fizikisht, në përpjekje për t’i marrë armën.
