Derisa fushata e spërkatjes kundër etheve hemorragjike po vazhdon në komunën e Malishevës, drejtori për shëndetësi, Hajdin Berisha ka bërë të ditur se numri i personave të thumbuar nga rriqrat është në rritje e sipër.
“Deri të dielën në mbrëmje, në QMKF të Malishevës, janë paraqitur 650 persona të thumbuar nga rriqrat, ndërsa numri po shtohet vazhdimisht, për shkak të kushteve të përshtatshme klimatike”, ka thënë Berisha në mbledhjen e rregullt të Këshillit komunal të drejtorëve.
Në anën tjetër, drejtori komunal për mbrojtje dhe shpëtim, Ahmet Morina ka njoftuar se në kuadër të masave mbrojtëse në luftimin dhe parandalimin e etheve hemorragjike krime kongo (EHCC), deri më tani janë spërkatur rreth 1.660 hektar sipërfaqe, ndërsa spërkatja e selektive e zonave endemike, është duke vazhduar.
Sipas të dhënave të drejtorisë komunale të shendetësisë, nga numri prej 650 personave, 606 janë nga Komuna e Malishevës, ndërsa 44 raste janë nga komunat tjera, por që kanë kërkuar ndihmë në QKMF të Malishevës.
Sipas drejtorit Berisha, në QKMF të Malishevës, janë duke u trajtuar të gjitha rastet e thumbimeve dhe po bëhen analizat e nevojshme dhe përcjellja e rasteve të dyshuara.
