Mediat amerikane raportojnë përmes agjencive të lajmeve për shpërndarjen dje të Kuvendit të Republikës së Kosovës dhe vendimin për mbajtjen e zgjedhjeve të parakohshme parlamentare në qershor.
Kanalet ABC, FOX News njoftuan se një vendim i tillë erdhi pasi Kuvendi ishte bllokuar në një numër çështjesh, përfshirë edhe krijimin e Forcave të Armatosura të Kosovës që u kundërshtua nga deputetët serbë. Në njoftim thuhej më tej se sipas kushtetutës së Kosovës, për çdo amendim të saj kërkohet vota e dy të tretave të ligjvënësve si dhe vota e dy të tretave të deputetëve të pakicave.
Në komente më tej thuhet se mbetet e paqartë nëse Kuvendi i ardhshëm do të jetë në gjendje për të kaluar legjislacionin rreth krijimit të ushtrisë sepse gjithashtu do të kërkohet mbështetja e dy të tretave të deputetëve të pakicave.
Qëndrimi zyrtar amerikan për ushtrinë e Kosovës ka qenë afirmativ, pasi tash disa vjet janë zhvilluar diskutime mbi mënyrat se ‘si Forca e Sigurisë së Kosovës do të mund të transformohej në një forcë tjetër, e aftë për të siguruar mbrojtje të kufizuar territoriale të Kosovës.
“Është një çështje e rëndësishme dhe ne presim me padurim të shohim se si FSK-ja do të kthehet në Forcë të Armatosur të Kosovës,” deklaroi ditë më parë drejtori i zyrës për Evropën Qendrore dhe Jugore në Departamentin e Shtetit, Jonathan Moore, raporton RTK.
Washingtoni zyrtar mendon se kjo çështje duhet të trajtohet në mënyrë të kujdesshme politikisht, ndërsa më se njëherë përgjithësisht ka mbështetur procesin e krijimit të Forcave të Armatosura të Kosovës dhe integrimin eventual të tyre në Partneritetin për Paqe të NATO-s. /Telegrafi/
