Këshilli për Mbrojtjen e të Drejtave dhe Lirive të Njeriut (KMDLNj) ka reaguar ndaj një deklarimi të zyrtarëve nga Ministria e Drejtësisë rreth raportimit për gjendjen e qendrave korrektuese në vendin tonë.
Sipas një komunikate të lëshuar për medie, thuhet se për KMDLNJ-në është shumë shqetësues se Shërbimi Korrektues i Kosovës (SHKK) kërcënon haptas për “ndërmarrjen e masave të mëtutjeshme” ndaj OJQ –ve në vend se të merret me përmbushjen e rekomandimeve që kanë për qëllim përmirësimin e kushteve të personave të privuar nga liria dhe lehtësimin e punës përmes ngritjes së cilësisë së punës për vet punëtorët e SHKK në përgjithësi dhe stafit korrektues në veçanti.
“KMDLNj nuk dëshiron të ketë qëndrim konfrontues ndaj SHKK por bashkëpunim konstruktiv. KMDLNj shpreson se SHKK do të fillojë t’i përmbush rekomandimet e Grupit Punues ndryshe do të bëhet përgjegjës për shkelje të drejtave të njeriut të personave të privuar nga liria si dhe shkelje të drejtave të njeriut të stafit korrektues”, thuhet në komunikatë.
Sipas njoftimit, Grupi Punues rekomandon që urgjentisht të mbyllet deri në renovim të tërësishëm Pavijoni nr.5 në Burgun e Dubravës ku të dënuarit mbahen në kushte të rënda dhe degraduese si edhe vet oficerët korrektues.
Pastaj, në kuadër të mundësive të fillojnë përmbushjen e rekomandimeve tjera. KMDLNj, si anëtar i Grupit Punues për formimin e Mekanizmit Kombëtarë për Parandalimin e Torturës shpreson se bashkëpunimi me SHKK –në është i domosdoshëm edhe në të ardhmen. Vetëm në këtë mënyrë sigurohet transparenca dhe llogaridhënia. /Telegrafi/
