Drejtoria e Arsimit e Komunës së Prishtinës ka njoftuar ndryshime në organizimin e procesit mësimor në shkollat e kryeqytetit, në kuadër të muajit të shenjtë të Ramazanit dhe në respekt të nxënësve dhe stafit që agjërojnë.
Sipas njoftimit zyrtar, mësimi do të nisë nga ora 07:30, ndërsa kohëzgjatja e mesndërrimit dhe pushimet e gjata do të reduktohen. Këto ndryshime synojnë që dita mësimore të përfundojë jo më vonë se ora 17:00.
Autoritetet komunale bëjnë të ditur se, pavarësisht riorganizimit të orarit, nuk do të ketë zvogëlim të numrit të orëve mësimore dhe as të kohëzgjatjes së tyre. Sipas Drejtorisë së Arsimit, qëllimi është ruajtja e cilësisë dhe vazhdimësisë së procesit mësimor, duke e bërë njëkohësisht atë më të përshtatshëm për periudhën e agjërimit.
Drejtoria thekson se masat janë ndërmarrë për të lehtësuar nxënësit dhe stafin arsimor gjatë Ramazanit, duke garantuar një organizim efikas dhe funksional të mësimit në të gjitha shkollat e Prishtinës.
