BE kërkon normalizim Kosovë–Serbi si kusht për rrugën evropiane; përshëndet procesin zgjedhor dhe angazhimin demokratik
Pas zgjedhjeve të mbajtura së fundmi në Kosovë, Bashkimi Evropian ka përshëndetur procesin zgjedhor dhe pjesëmarrjen aktive të të gjitha komuniteteve, duke theksuar se votimet treguan angazhim të fortë demokratik. Në deklaratën e përbashkët të shefes së politikës së jashtme të BE-së, Kaja Kallas, dhe komisares për zgjerim, Marta Kos, u nënvizua domosdoshmëria që vendi të formojë sa më shpejt institucionet e reja dhe të intensifikojë reformat që lidhen me integrimin evropian.
Sipas BE-së, ngërçi politik pas zgjedhjeve të shkurtit 2025 duhet të tejkalohet duke funksionalizuar Kuvendin dhe Qeverinë, me qëllim që vendi të vijojë pa vonesa me proceset reformuese. Përfaqësueset evropiane kërkuan që Kuvendi i ardhshëm të ratifikojë marrëveshjet e Planit të Rritjes për Ballkanin Perëndimor (2024–2027), për të shfrytëzuar plotësisht benefitet financiare dhe zhvillimore që ky instrument sjell, në interes të qytetarëve të Kosovës.
Kallas dhe Kos rikujtuan se Bashkimi Evropian ka nisur procesin e heqjes së masave ndaj Kosovës, duke konfirmuar se tashmë janë disbursuar 216 milionë euro të destinuara për projekte zhvillimore, ndërsa 205 milionë euro tjera pritet të lëvrohen në fillim të vitit të ardhshëm.
Në qendër të deklaratës evropiane mbeti dialogu Kosovë–Serbi. BE përsëriti qartë se normalizimi i marrëdhënieve mes dy vendeve është e vetmja mënyrë për të avancuar drejt integrimit në union. Palët u ftuan të zbatojnë pa vonesa detyrimet që dalin nga Marrëveshja për Rrugën drejt Normalizimit dhe marrëveshjet paraprake të dialogut, pa kushte shtesë.
Zgjedhjet e parakohshme në Kosovë u mbajtën më 28 dhjetor, me pjesëmarrjen e 24 subjekteve politike dhe 1.180 kandidatëve për deputetë. Rezultatet paraprake të Komisionit Qendror Zgjedhor nxorën fituese Lëvizjen Vetëvendosje me 49.31% të votave, e ndjekur nga PDK me 21.19%, LDK me 13.74% dhe AAK me 5.74%.
BE theksoi se pret bashkëpunim aktiv me qeverinë e re dhe vijimin e reformave që i afrojnë Kosovën më shumë me standardet evropiane.
