Universiteti i Prishtinës do të rikthejë afatet e nëntorit dhe prillit për rivlerësim të provimeve, pas një marrëveshjeje të arritur ndërmjet Parlamentit Studentor dhe Rektoratit të UP-së. Vendimi pritet të sjellë një trajtim më të barabartë për studentët e të gjitha fakulteteve.
Parlamenti Studentor njoftoi se kjo marrëveshje është rezultat i bashkëpunimit të ngushtë me udhëheqësinë e universitetit dhe se synon të sigurojë qasje të njëjtë për të gjithë studentët, pavarësisht njësisë akademike ku studiojnë.
Sipas komunikatës, është miratuar një fazë dyvjeçare tranzitore, gjatë së cilës afatet e rivlerësimit në nëntor dhe prill do të jenë të aplikueshme në të gjitha fakultetet e UP-së. Vendimi do të hyjë në fuqi pas miratimit formal në Senatin e Universitetit.
Parlamenti Studentor ka falënderuar rektorin prof. Arben Hajrullahu dhe prorektorët Adem Beha e Majlinda Zhitija Gjelaj për bashkëpunimin dhe përkrahjen e vazhdueshme. Falënderim i veçantë u është drejtuar edhe organizatave studentore që kontribuan në proces.
Në njoftim theksohet se Parlamenti Studentor do të vazhdojë të jetë “zëri i të gjithë studentëve të Universitetit të Prishtinës, pa dallime”, duke nënvizuar se ky vendim është një hap i rëndësishëm drejt standardizimit të të drejtave dhe mundësive akademike brenda universitetit.
