Shefi i partisë konservatore austriake ÖVP Michael Spindellegger, i cili është vicekancelar dhe ministër i Financave i Austrisë, përmes një letre i ka uruar sukses Lidhjes Demokratike të Kosovës në zgjedhjet e së dielës. Kjo përkrahje duket se ka ndikuar që ministri i Jashtëm i Kosovës, Enver Hoxhaj, të humbë kontrollin dhe ta fyejë rëndë ish-homologun e tij austriak, duke e quajtur „humbës“.
Gazeta austriake „Die Presse“ shkruan se minsitri Hoxhaj ka përdorur fjalë të ashpra dhe të pazakonshme kundër ministrit Spindelegger, i cili me vite të tëra ka qenë shef i diplomacisë austriake. „Jemi të befasuar, jemi të zemëruar“, ka thënë Hoxhaj duke folur për letrën e Spindelegger, ku në prag të zgjedhjeve parlamentare mbështetej kryetari i LDK-së Isa Mustafa. Sipas „Die Presse“ Hoxhaj, i cili vjen nga radhët e Partisë Demorkatike të Kosovës (PDK), e ka sulmuar ministrin e Jashtëm austriak për „ndërhyrje të paparë në zgjedhjet e Kosovës“. Madje Hoxhaj shkon një hap më tutje dhe kërkon nga ministri austriak që të kërkojë falje për letrën e tij mbështetëse për LDK-në.
Në „Die Presse“, e cila konsiderohet gazetë e afërt me partinë konservatore austriake ÖVP, Hoxhaj e ka quajtur ministrin Spindelegger „humbës“, ndonëse ÖVP është pjesë e koalicionit qeverisës në Austri. „Spindelegger është humbës klasik i zgjedhjeve. Njëjtë si Isa Mustafa, këtu nuk do të ndryshojë asgjë as pas përkrahjes nga Austria. Pra, një humbës zgjedhjesh po e mbështet një humbës tjetër të zgjedhjeve“. Hoxhaj vazhdon me sulmet ndaj Spindelegger duke thënë se sjellja e tij e paskësh dëmtuar imazhin e Austrisë në Kosovë. „Kam jetuar shtatë vjet në Vjenë. Nuk mund ta kuptojë këtë“, thotë Hoxhaj.
Në partinë konservatore austoriake ÖVP sjellja skandaloze e Hoxhajt ka shkaktuar habi të pakëndshme. Zyrtarë të kësaj partie i kanë thënë „Die Presse“ se brenda familjeve konservatore dhe popullore europiane është krejt e zakonshme që të përkrahen partitë simotra. LDK dhe ÖVP janë pjesë e familjes së partive popullore europiane, ku është anëtare edhe CDU e kancelares gjermane Angela Merkel. Në letrën e Spindelegger dërguar kryetarit të LDK-së Isa Mustafa thuhet se mes ÖVP dhe LDK-së ekzistojnë marrëdhënie të shkëlqyera prej vitesh. Spindelegger beson se LDK, Isa Mustafa dhe ekipi i tij kanë “program të shkëlqyeshëm dhe idetë më të mira për reformat e duhura“.
