Policia e Kosovës për rajonin e Pejës ka bërë të ditur se ka arrestuar një person, i dyshuar për kryerjen e 11 veprave penale.
Sipas njoftimit zyrtar, pas një pune intensive hetimore nga stacioni i Pejës, hetuesit kanë arritur të arrestojnë të dyshuarin, i cili, në bashkëpunim me një tjetër person, gjatë muajve qershor, korrik dhe gusht, dyshohet se ka kryer një seri vjedhjesh të rënda.
“Këto vjedhje të rënda janë kryer në shtëpi dhe lokale të ndryshme në qytetin e Pejës, ku nga të dyshuarit janë marrë para dhe sende të ndryshme”, thuhet në njoftim.
Pas intervistimit nga hetuesit, në prezencën e avokatit mbrojtës, me urdhër të prokurorit të shtetit, i dyshuari është dërguar në mbajtje për 48 orë. Ndërkaq, personi tjetër që dyshohet për këto vepra aktualisht ndodhet në arrati, por është i njohur për Policinë.
Policia e Kosovës thekson se hetimet për këto raste vazhdojnë dhe se po bëhen përpjekje për kapjen e personit në arrati, për të parandaluar kryerjen e veprimeve të tjera penale.
