Një skemë e dyfishtë kriminale, që përfshin fajde me interesa të larta dhe organizim të bixhozit të paligjshëm, ka çuar në bankën e të akuzuarve një person nga Prizreni. Prokuroria Themelore e Prizrenit, Departamenti për Krime të Rënda, ka ngritur aktakuzë kundër F.Sh., i cili që nga 9 dhjetori 2024 ndodhet nën masën e paraburgimit.
Sipas dosjes së prokurorisë, ngjarjet kanë nisur në shtator 2023 dhe kanë vazhduar deri në momentin e arrestimit. I pandehuri akuzohet për dy vepra penale të rënda: “Fajdeja” dhe “Organizimi i skemave piramidale dhe bixhozit të paligjshëm”, të përcaktuara në Kodin Penal të Republikës së Kosovës.
Hetimet zbulojnë se F.Sh. ka shfrytëzuar vështirësitë financiare të viktimës A.Z., duke i dhënë borxhe me kushte të pamëshirshme. Fillimisht, viktima i kishte borxh 70 mijë euro dhe nuk arrinte ta shlyente. Në prill 2024, i pandehuri i dha një shumë tjetër prej 10 mijë eurosh me interes 15%. Vetëm dy muaj më vonë, në qershor, e furnizoi sërish me 5 mijë euro, por për gjashtë javë viktima u detyrua të paguante 3 mijë euro vetëm në kamatë.
Ky cikël u përsërit disa herë: në qershor dhe korrik me shuma nga 2 mijë deri në 10 mijë euro, me interesa që shkonin deri në 20%. Në gusht 2024, marrëdhënia huadhënës–borxhli arriti kulmin, kur brenda një muaji u dhanë disa hua me fajde. Pika e fundit u vendos më 9 dhjetor 2024, në fshatin Shirokë të Suharekës, kur policia e kapi F.Sh. në flagrancë duke marrë 5 mijë euro nga viktima, sërish në emër të kamatave të papaguara.
Në total, viktima kishte paguar ilegalisht 14,600 euro në interesa, ndërsa ende i mbeteshin për të paguar 21,400 euro. Shuma totale e kamatave nga të gjitha huazimet arrinte në 81,400 euro – një fitim i paligjshëm i konsiderueshëm për të pandehurin.
Por historia nuk përfundon këtu. Nga janari deri në prill 2024, F.Sh. dyshohet se ka organizuar dhe drejtuar lojëra fati të palicencuara, duke përdorur programe elektronike të ngjashme me kazinotë online. Viktima A.Z., jo vetëm që luante në këto lojëra, por edhe u zhyt thellë në borxhe: 70 mijë euro për bixhozin, plus 20 mijë euro të tjera të dhëna paraprakisht për të pasur qasje në këto lojëra. Humbja e tij financiare nga bixhozi dhe fajdet, sipas prokurorisë, arrin në 90 mijë euro.
Prokuroria ka kërkuar që pas shqyrtimit gjyqësor dhe administrimit të provave, i pandehuri të shpallet fajtor dhe të dënohet sipas ligjit. Ky rast, që kombinon fajden dhe bixhozin e paligjshëm, nxjerr në pah se si varësia nga paratë dhe loja mund të shfrytëzohen brutalisht për përfitime të mëdha të paligjshme.
