Farat e chia-s mund të mos jenë ushqimi i parë që ju vjen ndër mend për shëndetin e zemrës, por kërkimet e fundit sugjerojnë se ato mund të ndihmojnë në uljen e tensionit të gjakut, kolesterolit dhe nivelit të triglicerideve.
Çfarë tregojnë studimet
Një studim i publikuar nga Elsevier në revistën Prostaglandins & Other Lipid Mediators shton prova të reja në rritje për përfitimet potenciale shëndetësore të farave të chia-s.
“Farat e chia-s janë burim i pasur me lëndë ushqyese, proteina, fibra, antioksidantë dhe përbërës fenolikë,” shpjegon Stephani Johnson, dietologe dhe profesoreshë në Universitetin Rutgers.
Megjithatë, vlen të theksohet se analizat sistematike dhe meta-analizat tregojnë modele të lidhjes dhe jo domosdoshmërisht shkak dhe pasojë.
Rezultatet e studimeve janë të përziera, pasi ato ndryshojnë në lidhje me pjesëmarrësit, sasinë e farave të chia-s që u përdorën dhe kohëzgjatjen e konsumit. Deri më tani, nuk ka prova të mjaftueshme për të thënë me siguri se farat e chia-s kanë ndikim të drejtpërdrejtë dhe të fuqishëm në shëndetin e zemrës. Por teoritë janë premtuese.
Si mund të ndihmojnë farat e chia-s në shëndetin e zemrës
1. Janë të pasura me fibra
Farat e chia-s përmbajnë sasi të larta fibrash, të cilat ndihmojnë në uljen e kolesterolit.
“Kur përzihen me ujë, farat e chia-s formojnë një masë xhelatinoze të quajtur musilazh, që mund të ndihmojë në eliminimin e kolesterolit përmes sistemit tretës,”
2. Janë të pasura me omega-3 dhe antioksidantë
“Farat e chia-s janë burim i acideve yndyrore omega-3, të cilat lidhen me rritjen e nivelit të kolesterolit HDL i njohur si ‘kolesteroli i mirë’, që mbron nga sëmundjet e zemrës,
Ato gjithashtu përmbajnë antioksidantë që mund të parandalojnë oksidimin e kolesterolit LDL, një proces që kontribuon në formimin e pllakave në arterie dhe rrit rrezikun për sëmundje koronare të zemrës.
3. Mund të ndihmojnë në uljen e inflamacionit
Farat e chia-s përmbajnë acid alfa-linolenik (ALA), një formë bimore e omega-3, e cila është treguar se ndihmon në uljen e inflamacionit në enët e gjakut dhe në të gjithë trupin.
Si t’i përfshini farat e chia-s në ushqyerjen tuaj
Farat e chia-s nuk e mbrojnë zemrën në mënyrë të vetme, por mund të jenë pjesë e një stili jetese të shëndetshëm. “Përfitimet e tyre realizohen më së miri kur janë pjesë e një rutine të balancuar që përfshin ushqyerje të shëndetshme, aktivitet fizik të rregullt dhe gjumë të mjaftueshëm,
Për të përfituar nga vlerat shëndetësore të njohura, rekomandohet konsumimi i 2 deri në 3 lugë gjelle farë chia në ditë. Ato mund të lagen ose të përzihen për tretje më të lehtë.
Meqë kanë një shije të butë, mund të shtohen lehtësisht në receta të zakonshme si:
- Puding me fara chia
- Shtesë në salca ose salca sallatash
- Smoothie
- Toptha ose shufra energjie
Çfarë nënkupton kjo për ju
Nuk ka ende prova të mjaftueshme për të pohuar me siguri se farat e chia-s përmirësojnë në mënyrë të drejtpërdrejtë sistemin kardiovaskular. Megjithatë, ato ofrojnë shumë përfitime të njohura shëndetësore dhe janë të lehta për t’u përfshirë në dietë për të shtuar fibra, proteina dhe antioksidantë.
