Të rigjeni ndjenjën e vetes përtej stresit politik
George J. Ziogas
Shtetet e Bashkuara sapo kanë kaluar atë që shumë nga banorët e saj (dhe pjesa më e madhe e botës) e konsideruan një zgjedhje kombëtare shumë të kontestuar.
Pavarësisht se cili kandidat fitoi, është e qartë se segmente të mëdha të popullsisë amerikane po vuajnë nga “sfilitja politike” (dhe, me shumë mundësi, edhe nga stresi post-traumatik i zgjedhjeve).
Zgjedhjet mbaruan. Procesi i rimëkëmbjes nga sfilitja politike dhe ruajtja e ekuilibrit tuaj, megjithatë, mund të jetë vetëm në fillim.
Çfarë është sfilitja politike?
Fenomeni i sfilitjes politike nuk është i ri. Zgjedhjet e mëparshme në SHBA në vitin 2020 dhe 2016 gjithashtu shkaktuan stres si te votuesit ashtu edhe te jovotuesit amerikanë. Po ashtu, përdorimi i negativitetit ekstrem në reklamat dhe diskursin politik ka qenë i pranishëm në politikën amerikane dhe botërore për dekada.
Një term tjetër që është krijuar për të përshkruar stresin politik është “çrregullimi i stresit zgjedhor”, por për mua problemi duket se ka më pak të bëjë me zgjedhje specifike sesa me tonin e përgjithshëm të diskursit tonë politik në mbarë botën.
Sfilitja (burnout) përgjithësisht kuptohet si ndjenja se “rezervat tona të energjisë emocionale janë shteruar”. Edhe pse jemi mësuar të flasim për sfilitjen në aspektin e karrierës ose marrëdhënieve tona, ne padyshim mund të përjetojmë sfilitje që lidhet me dëgjimin e lajmeve politike pa ndërprerje, shikimin e memeve të debatueshme në mediat sociale, marrjen e postës apo letrave politike, ose debatet politike me anëtarët e familjes dhe të tjerët.
Sfilitja politike mund të na lërë të ndihemi “të pamotivuar, të pashpresë, në ankth dhe të lodhur”. Simptoma të tjera të sfilitjes politike i ngjajnë shumë simptomave të ndjenjës së stresit. Këto përfshijnë rraskapitjen, ndjenjën e shkëputjes dhe zemërimit, çrregullime në modelet tuaja të gjumit dhe të ushqyerit, nervozizëm dhe humbjen e interesit për aktivitete të tjera që më parë i keni shijuar (ndër shumë të tjera).
Sfilitja politike mund t’ju lërë gjithashtu me dëshirën dërrmuese për të mos u angazhuar më kurrë me lajme politike apo të tjera, dhe për të shmangur çdo bisedë politike personalisht ose në mediat sociale.
Si të rikuperoni energjinë tuaj personale dhe politike
Qeveritë dhe lidershipi politik kanë ndikime shumë reale në jetët tona të përditshme. Për shkak se lajmet politike janë kaq qendrore për të gjitha përvojat tona, mund të jetë e vështirë të shkëputeni plotësisht prej tyre.
Atëherë, si mund ta përballoni vërtet sfilitjen politike? Këtu janë tre sugjerime për t’ju ndihmuar të adresoni stresin tuaj pas-zgjedhor.
1. Ndiheni rehat me atë që mund të kontrolloni, dhe atë që nuk mundeni
Ky sugjerim i parë do të jetë shumë i njohur për këdo që ka mësuar të përballet me ankthin. E vërteta e thjeshtë e çështjes është se disa gjëra janë jashtë kontrollit tonë, dhe është e rëndësishme ta pranoni këtë. Pavarësisht se si keni votuar, ju thjesht nuk mund të kontrolloni veprimet e miliona votuesve të tjerë.
Të pranosh që nuk i kontrollon opinionet politike apo kuptimin e të tjerëve nuk është gjithmonë e lehtë. Kjo nuk do të thotë që do t’i doni menjëherë ose do të shkoni mirë me ata me të cilët nuk pajtoheni.
Pranimi mund të nënkuptojë se duhet të jeni realistë se ku dhe si zgjidhni të kaloni kohën tuaj. Të ndihesh i sfilitur nga politika dhe reklamat politike nuk do të thotë se duhet të heqësh dorë nga aktivizmi politik që është i rëndësishëm për ty.
Përqendrohuni më pak në ndryshimin e mendjes së të tjerëve. Përqendrohuni më shumë në kuptimin se cilat çështje janë më të rëndësishmet për ju, dhe gjeni aktivitete në të cilat mund të angazhoheni dhe që pasqyrojnë vlerat dhe besimet tuaja.
2. Vepro ndryshe nga të tjerët
Kjo është veçanërisht e rëndësishme në lidhje me përdorimin e mediave sociale dhe konsumin e përgjithshëm të medias. Pranoni se mediat sociale njihen ose për t’ju treguar material nxitës që është bërë viral, ose për opinione të ndara nga të tjerët me profilin tuaj të saktë politik.
Asnjëri nga këto burime informacioni, as ato sensacionalisht virale, as ato të zgjedhura për ju nga algoritmi, nuk bëjnë një punë të mirë në pasqyrimin e gamës së gjerë të opinioneve që ekzistojnë vërtet në botë.
Kur ndiheni veçanërisht të dëshpëruar, largohuni nga mediat sociale për një ose dy ditë. Bëni çdo gjë tjetër që mund të ndryshojë ose lehtësojë humorin tuaj. Dëgjoni diçka të dobishme për mendjen dhe zemrën tuaj. Lexoni një libër. Bëni një shëtitje.
Pastaj, kur të ktheheni për të lexuar titujt kryesorë, herë pas here, klikoni në disa burime të ndryshme. Dhe mos harroni këtë këshillë të urtë që ka ekzistuar pothuajse aq gjatë sa seksionet e komenteve në internet: Mos i lexoni komentet. Thjesht mos i lexoni. Ka shumë gjëra të tjera për të lexuar që janë krijuar dhe verifikuar nga profesionistë që dinë të shkruajnë, jo vetëm të ndezin gjakrat. Kurseni kohën tuaj, kurseni jetën tuaj.
3. Bëni diçka aktive (për veten tuaj, jo vetëm për të tjerët)
Ndonjëherë pengesa më e madhe për t’u bërë aktiv në çfarëdo mënyre është inercia. Nëse jeni ulur, thjesht doni të qëndroni ulur. Nëse jeni i tmerruar nga lajmet e përditshme dhe politike, thjesht doni të vazhdoni të jeni i tmerruar.
Mundohuni të shpëtoni nga ai kurth. Filloni duke u ngritur në këmbë dhe duke u larguar nga çdo burim mediatik. Nuk keni nevojë të largoheni për shumë kohë; të gjitha jetët tona dhe shumë nga mjetet tona të jetesës janë të lidhura në mënyrë të pashkëputshme me të qenit online, dhe kjo nuk do të ndryshojë.
Por kjo nuk do të thotë që nuk mund të ngriheni dhe të bëni disa ushtrime shtrirëse. Bëni çdo gjë të vogël aktive pozitive që mundeni për të rimarrë autonominë tuaj personale. Shkruani një shënim për një mik ose të afërm që dyshoni se mund të ndiejë të njëjtën sfilitje. Luani një lojë me fëmijën tuaj. Ngrihuni dhe bëni disa ushtrime. Jepini përparësi gjërave themelore, si ushqimi i shëndetshëm dhe gjumi.
Nuk keni pse të bini pre e sfilitjes suaj politike
Pranoni, më e rëndësishmja, se sfilitja politike nuk ka pse të zbatohet në çdo aspekt të jetës suaj. Ju mund të jeni të lodhur nga politika, por mund ta përdorni këtë kohë për të zhvendosur fokusin tuaj në aspekte të tjera të jetës suaj që ju sjellin paqe ose gëzim.
Pastaj, kur të jeni gati, shikoni përreth për mënyra për t’u angazhuar dhe për të qenë aktivë në ato çështje dhe probleme specifike që janë të rëndësishme për ju.
Por, për të përdorur një analogji nga udhëtimet me avion, fillimisht vendosni maskën tuaj të oksigjenit. Përpara se të ndihmoni të tjerët, mbani mend se duhet të jeni në gjendje të merrni frymë vetë.
