Mijëra u mblodhën në Westminster për të protestuar kundër nxjerrjes jashtë ligjit të grupit të veprimit të drejtpërdrejtë
Protestuesit u ulën në Sheshin e Parlamentit, në qendër të Londrës, në një demonstratë me pankarta ‘Hiqni ndalimin’ që bën thirrje për rrëzimin e aktit të konsiderimit si të jashtëligjshme të rrjetit të veprimit “Palestine Action”,
Një total prej 890 personash janë arrestuar këtë fundjavë teksa protestonin kundër nxjerrjes jashtë ligjit të grupit të veprimit të drejtpërdrejtë Palestine Action, tha policia të dielën.
Policia Metropolitane (Met) tha se 857 persona ishin arrestuar sipas Aktit të Terrorizmit 2000 për mbështetjen e një grupi të ndaluar gjatë demonstratës së së shtunës.
33 të tjerë u arrestuan për vepra të tjera, përfshirë sulmet ndaj oficerëve të policisë.
Qindra ishin mbledhur të shtunën në Sheshin e Parlamentit në Westminster, duke mbajtur pankarta kartoni ku shkruhej “Unë mbështes Palestine Action” dhe duke valëvitur flamuj në mbështetje të Palestinës.
Oficerët rrethuan protestuesit dhe i bartën ata një nga një drejt furgonëve që prisnin, me policinë që i mbante nga secila gjymtyrë ndërsa turmat brohorisnin “turp të keni”.
Disa nga ata që po arrestoheshin qëndruan në heshtje, ndërsa të tjerë brohorisnin “Palestinë e lirë” dhe u kërkonin oficerëve të mos ndiqnin urdhrat dhe t’i lironin.
Mediat ishin dëshmitarë se oficerët e policisë lexonin një deklaratë të përgatitur paraprakisht ndërsa arrestonin protestuesit, duke deklaruar se po i ndalonin ata nën “dyshimin se jeni anëtar ose mbështetës i grupit të ndaluar Palestine Action”.
Një protestues u pa me gjak që i rridhte në fytyrë pasi u arrestua, ndërsa një tjetër mund të dëgjohej duke bërtitur se policia i kishte lënduar shpinën gjatë arrestimit të tij.
Para se të fillonte protesta ulur në orën 13:00, organizatorët u panë duke u shpërndarë stilolapsa, copa kartoni dhe këshilla ligjore pjesëmarrësve në Sheshin e Parlamentit.
Oficerë nga Policia e Qytetit të Londrës, Policia e Uellsit dhe Policia e Suffolk-ut u panë duke ndihmuar operacionin e Met të shtunën.
Ndër ata të ndaluar nga policia ishin dhjetëra protestues të moshuar dhe familjarë të të mbijetuarve të Holokaustit, të cilët u ulën në heshtje në lëndinën në Sheshin e Parlamentit.
Steve Masters, një veteran i ushtrisë britanike, u arrestua nga Met për mbajtjen e një tabele letre në mbështetje të Palestine Action. Ai u largua me forcë pasi u hoq nga karroca e tij invalidore.
Para arrestimit të tij, ai i tha MEE se iu bashkua protestave pasi dëshmoi “skenat dëshpëruese që shpalosen në Gaza”.
“Kam shërbyer në Forcën Ajrore Mbretërore për 19 vjet. E ndiej të rëndësishme të jem këtu sepse, pavarësisht nëse jeni dakord apo jo me taktikat e Palestine Action dhe të tjerëve, realiteti është se qeveria jonë është bashkëfajtore në gjenocid në nivelin më të lartë,” tha ai.
“Të vij këtu për të kundërshtuar nxjerrjen jashtë ligjit është më e pakta që mund të bëj, krahasuar me sakrificat që po bëhen nga populli i Gazës dhe nga ata që ndërmarrin veprime të drejtpërdrejta me Palestine Action.”
Defend Our Juries (DOJ), e cila ka organizuar protesta të rregullta që kur qeveria lëvizi për të nxjerrë jashtë ligjit Palestine Action në korrik, u tha protestuesve që u regjistruan për demonstratën e së shtunës të mos jepnin detajet e tyre personale oficerëve për të detyruar përpunim masiv në stacionet e policisë.
Grupi kishte caktuar një konferencë shtypi të martën për të njoftuar se rreth 1,500 njerëz do të rrezikonin arrestimin sipas Aktit të Terrorizmit për mbajtjen e tabelave ku shkruhej: “Unë kundërshtoj gjenocidin. Unë mbështes Palestine Action.”
Megjithatë, konferenca u shty pasi shtatë nga folësit kryesorë të saj, përfshirë ish-avokatin e qeverisë Tim Crosland, u arrestuan sipas nenit 12 të Aktit të Terrorizmit 2000. DOJ tha se të arrestuarit ishin mbajtur përtej afatit kohor të paraburgimit prej 24 orësh dhe u ishin bastisur shtëpitë.
Të enjten, Ministria e Brendshme fitoi një vendim gjyqësor që e lejonte atë të sfidonte vendimin për të dhënë një rishikim gjyqësor të nxjerrjes jashtë ligjit të Palestine Action sipas legjislacionit të terrorizmit, i cili ishte caktuar për në nëntor.
