Deklaratë e Forumit Musliman të Shqipërisë mbi situatën në Gaza

0

Prej pothuaj dy javësh, makineria ushtarake e Izraelit ka ndërmarrë sulme ajrore e tokësore ndaj popullsisë së Rripit të Gazës. Bombardimet e shumta dhe përdorimi i armëve të ndaluara nga Kombet e Bashkuara për qendrat e banuara, ka shkaktuar mbi 800 viktima dhe rreth 5000 të plagosur, shifër që rritet përditë dramatikisht, ku pjesën dërrmuese e përbëjnë fëmijët dhe gratë.
Forumi Musliman i Shqipërisë, si një organizatë e shoqërisë civile, që promovon dinjitetin dhe barazinë njerëzore, luftën kundra racizmit, aparteidit dhe ksenofobisë, dënon me forcë agresionin e ushtrisë izraelite me bombardimin e spitaleve, ambulancave, tregjeve, stadiumeve, shkollave dhe banorëve të pafajshëm të Gazës, siç dënon në të njëjtën kohë kolonizimin e tokave të Bregut Perëndimor, si iniciativa thelbësore sabotuese të marrëveshjes së paqes mes Izraelit dhe Palestinës.
FMSH mendon se çdo popull ka të drejtën të ekzistojë dhe se kjo e drejtë nuk është ekskluzive vetëm e dikujt. FMSH me keqardhje konstaton, se organizmat ndërkombëtare, qeveritë e vendeve demokratike, janë të sforcuara në heshtjen e tyre përballë protestave masive të opinionit publik në mbarë botën, në të cilat dënohen ashpër akte të tilla gjenocidale. I bëjmë thirrje Organizatës Kombeve të Bashkuara të ndërmarrin në mënyrë të menjëhershme hartimin e një rezolute, për dënimin e vrasjeve të civilëve ne Gaza, si krime kundër njerëzimit. Vlerat e përbashkëta universale me të cilat u frymëzuan qytetërimet demokratike, fatkeqësisht sot, përtej universalitetit të tyre, po kthehen ne vlera gjeografikisht të ndryshme, ku shtypja, vrasja, dëmtimi i pronës, grabitja e tokave, për një rajon gjeografik përbën krim kundër njerëzimit, kurse për rajone të tjera, përfshirë edhe Gazën, interpretohen si e drejta e dikujt për të ekzistuar.
Forumi Musliman i Shqipërisë i kërkon Qeverisë Shqiptare të prononcohet mbi gjenocidin që po ushtrohet ndaj popullsisë së Gazës dhe bën thirrje publike për ndalimin e menjëhershëm të luftimeve, lejimin e ndihmave dhe ekipeve humanitare, në mënyrë që tragjedia të mos rëndohet më tej. Ne mendojmë se të drejtën për të ekzistuar në të njëjtën formë dhe intensitet e kanë edhe banorët autoktonë palestinezë dhe se paqja për këtë rajon arrihet vetëm duke e konsideruar dinjitetin njerëzor jo vetëm si atribut i një race në kurriz të një tjetre. 

Share.

About Author

Leave A Reply

Visit Us On TwitterVisit Us On FacebookVisit Us On YoutubeCheck Our Feed
themekiller.com