Duket se do të jetë e largët dita kur kosovarët do të lëvizin lirshëm në Zonën e Shengenit. Zyrtarisht, zyrtarët e BE’së kanë thënë se vizat nuk hiqen këtë vit, derisa eurodeputetja Ulrike Lunacek kishte përmendur vitin 2016 si periudhë të mundshme për liberalizimin e vizave për shtetasit e Kosovës.
Por burime të Express nga Brukseli bëjnë me dije se parashikimet e fundit në këtë drejtim janë akoma më të errëta.
Kështu, në fillim të kësaj jave një delegacion i Komisionit Parlamentar për Punë të Jashtme vizitoi Komisionin për Punë të Jashtme të Parlamentit Europian. Aty, sipas burime të Express, anëtarët kosovarë të Komisionit janë vënë në dijeni se edhe tri vite s’ka asnjë shans që kosovarët të lëvizin lirshëm.
“Ndoshta në vitin 2017 mund të lëvizim lirshëm në Europë”, ka thënë një anëtar i Komisionit Parlamentar për Politikë të Jashtme në kushte anonimiteti për Gazetën Express.
Sipas tij, nuk ekziston komunikim normal për këtë çështje mes institucioneve europiane.
“Çështja ka ngecur si pasojë e një mungese totale të interesimit, madje nuk duket se ekziston interesim as për të komunikuar për këtë punë në mes Komisionit Europian dhe Parlamentit Europian”.
Ndryshe, zyrtarët e Qeverisë së Kosovës kanë qenë shumë më optimist për këtë proces vite më parë sesa tash. Ministrja Vora Çitaku fajin për këtë e ka hedhur në Bruksel, derisa ka refuzuar vazhdimisht ta përmend vitin se kur kosovarët do të lëvizin lirshëm në Zonën e Shengenit.
