Të ulur në trotuare skaj rrugës. Disa të mbështetur në shtylla elektrike e të tjerë të ulur në tokë nga lodhja dhe rrezet përcëlluese të diellit. Këta janë kosovaret të cilët edhe 14 vjet pas përfundimit të luftës presin para ambasadave të Evropës për të marrë një vizë Schengen.
Kosova ka mbetur vendi i vetëm në Evropë që ende nuk e ka fituar të drejtën e liberalizimit të vizave për qytetarët e saj.
Ndonëse në këtë vend janë të vendosura të gjitha strukturat evropiane, dhe një personel i konsiderueshëm i stafit civil dhe ushtarak, kjo gjë nuk ka ndikuar që Kosova të dal nga “Geto” e Evropës.
Vetëm një përqindje e vogël e aplikuesve marrin përgjigjen për lëshimin e vizës ndërsa pjesës më të madhe iu refuzohet kjo e drejtë.
“Na vjen keq kur nuk ju lëshohet viza. Arsyeja është se nuk ka garanci që do të ktheheni sërish ne vendin tuaj”.
Kjo është përgjigjja më e shpeshtë që u kthehet shumicës së aplikantëve për viza nga ambasadat.
Ndonëse vetë plotësimi i formularit të aplikimit të vizës është garancia e dhënë. Kështu thotë njeri nga punëtoret e agjencive private të udhëtimit dhe plotësimit të dokumenteve që veprojnë përballë ambasadës së Zvicrës, Austrisë dhe Francës. /Tribuna/
