Presidenti sirian Ahmed al-Sharaa dhe dy ministra të kabinetit të tij kanë qenë objekt i pesë tentativave të dështuara për atentat gjatë vitit të kaluar, sipas një raporti të publikuar nga Zyra e OKB-së për Kundër-Terrorizëm.
Sipas dokumentit, në shënjestër kanë qenë presidenti al-Sharaa, ministri i Brendshëm Anas Hasan Khattab dhe ministri i Jashtëm Asaad al-Shaibani. OKB-ja nuk ka bërë publike datat e sakta të këtyre përpjekjeve, por ka theksuar se ato kanë ndodhur në veri të Aleppos dhe në provincën jugore të Deraas.
Autorët identifikohen si një grup i armatosur që vepron si strukturë e lidhur me organizatën e njohur si ISIS. Ekspertët e antiterrorizmit e vlerësojnë këtë strukturë si një front operacional, i krijuar për të kryer sulme ndaj objektivave të rëndësishëm duke shmangur ekspozimin e drejtpërdrejtë të udhëheqjes qendrore.
Raporti paralajmëron se këto tentativa dëshmojnë përpjekjet e vazhdueshme të këtij grupi për të shfrytëzuar boshllëqet e sigurisë dhe pasigurinë në vend me qëllim destabilizimin e administratës siriane.
Ahmed al-Sharaa mori udhëheqjen e vendit në dhjetor 2024, pas rrëzimit të presidentit Bashar al-Assad, duke i dhënë fund një lufte civile 14-vjeçare. Administrata e tij është prezantuar si një qeveri që synon stabilitetin, rindërtimin dhe përfaqësimin e shumicës së popullit sirian, duke theksuar identitetin islam dhe sovranitetin kombëtar të vendit.
Megjithëse organizata ka humbur kontrollin territorial që kishte më parë, raporti thekson se ajo vazhdon të ketë një prani të konsiderueshme nëntokësore. Sipas vlerësimeve të ekspertëve të OKB-së, grupi ka rreth 3,000 luftëtarë në Irak dhe Siri, me shumicën të vendosur në territorin sirian.
Objektivat kryesore mbeten forcat e sigurisë, veçanërisht në veri dhe verilindje të Sirisë, çka tregon se kërcënimi ndaj stabilitetit të vendit mbetet ende i pranishëm.
