Nga Fatmir Baçi
1% DO ISHTE E MJAFTUESHME
Trasmetohet se Pejgamberi a.s. ka thënë:
“Njerzit janë si devet, në çdo 100 prej tyre vetëm njëra është e aftë për udhëtime të gjata.”
Duke vendosur në fokus këtë 1% të shoqërisë si elita e një gjuhe apo një populli, lind nevoja e shtjellimit rreth arsyeve themelore të cilat do të na ndihmojnë të kategorizojmë më saktë konceptin e të qenit elitë.
Vite më parë, djali i dytë më thotë:
– Babo, unë e di si vijnë vezët në frigorifer.
– Po – i thashë – më thuaj si e di.
– Kur biem në gjumë, vijnë pulat natën dhe bëjnë vezë në frigorifer.
Duke menduar se bëhej fjalë për fantazi fëmije, u perpoqa sa më thjeshtë t’ia shtjelloj gjithë zinxhirin e bërjes së vezëve dhe tregun që e shoqëron. Por pa sukses.
– Jo – më tha im bir 4 vjeç – nuk është ashtu, ti nuk e di. Mua më ka thënë Selimi (vellai i madh 8 vjeç) dhe është ashtu si thotë ai.
Gjithçka m’u bë e qartë, për fëmijët e mi, elita e besueshme dhe më e afërt me vizionin e tyre, ishte djali i madh, ndërsa unë isha një komplikim i panevojshëm.
Fakt është se të gjithë shtresimet shoqërore kanë nga një elitë të vetën, e cila përmbush më së miri takimin e ëndrrës së tyre me mynyren ideale dhe praktike se si ata duan ta ushtrojnë dhe manifestojnë dinamikën e tyre.
Mirepo, kjo nuk është devja e 1% të shoqërisë, ajo është 1% i specifikuar për një shtresim shoqëror të përcaktuar brenda një veprimtarie. Të tilla janë shumë. Këto lloj elitash të copëzuara në shtresime shoqërore, kanë peshën e të qenit evidencë e kujtesës për zejen që kanë ushtruar, apo në rastin më të mirë, një pritshmëri afatshkurtër po për të njëjten zeje që vazhdojnë ta ushtrojnë.
Veçoria e 1% të shoqërisë bart vizionin e njeriut në gjithë kumtin dhe kuptimet e të qenit njeri, duke zgjuar konsideratën e thelbit të përgjegjësisë si në përmasën etike, ashtu edhe në mynyren si duhet të manifestohet etika në estetike, kjo, e lidhur ngushtë me qëllimin e fundme të njeriut.
Pra, ky 1% i shoqërise, nuk hyn në konflikt me asnjë aspiratë të drejtë të shtresimeve shoqërore, kjo sepse në fokus të vëmendjes së tyre është njeriu, pavarësisht nga zeja që ushtron dhe përtej rezervimeve në vemendjen e shoqërisë të individëve të ndryshëm të cilët spikasin ndërmjet stacioneve të shpeshta të rrugëtimit shoqëror.
Njerzit që veçohen si 1% i shoqerise, janë të begatuar me njohje dhe dije për të dalluar ndryshimin ndërmjet lëvizjeve afatshkurtëra nga ato afatgjata, duke bërë kësisojë diferencën në mynyrën e përceptimit të së ardhmes, duke përafruar dhe sqaruar gjithë përgjegjsitë për “elitat” e shtresimeve të ndryshme shoqërore, duke i theksuar si ndihmese për qëllimin e fundit të secilit njeri.
Për të qenë një shoqëri e suksesshme, krahas vëmendjes që i kushton 1% të “elites” afatshkurtër të shtresave të shoqërisë, duhet që t’i kushtoje një vëmendje të shumëfishuar 1% afatgjatë të shoqërisë, sepse vetëm kësisojë do mund të harmonizojë pa konflikt interesat e secilit individ, si ndihmesë të secilit në lidhje me qëllimin e fundit pa i fshirë nga dinamika e përgjithëshme qëllimet afatshkurtera.
Me sa di une të dalloj, këto 100 vjetët e fundit, apo edhe më shumë, shqiptarët kanë ditur mrekullisht të dallojnë “devet” e afta për udhëtime të gjata, sepse të gjitha “devet” që i shitën për pesë pare spec, që i therën për orekse makabre, që i lanë të mbyllura të vdesin urie, më rezultojnë nga elita 1% të shoqërise.
