Agjencia e Menaxhimit Emergjent (AME), në kuadër të Ministrisë së Punëve të Brendshme, ka publikuar raportin e përditësuar për situatën e vërshimeve në nivel vendi për periudhën 9–10 janar 2026, duke bërë të ditur se gjendja aktuale paraqitet kryesisht stabile dhe e menaxhueshme.
Sipas të dhënave të mbledhura nga Qendrat Operative Emergjente 112, Njësitë e Zjarrfikësve dhe Shpëtimit, strukturat për Mbrojtje dhe Shpëtim, si dhe nga raportimet e qytetarëve, pas uljes së intensitetit të reshjeve të shiut dhe fillimit të reshjeve të borës, në shumicën e rajoneve është vërejtur përmirësim i dukshëm i situatës. Nivelet e ujit në lumenj dhe përrenj kanë shënuar rënie graduale dhe nuk raportohet për humbje jete.
Në rajonin e Prishtinës, vërshime janë regjistruar në disa rrugë në Prishtinë, Lipjan, Shtime dhe Graçanicë. Ndërkaq, në komunat Fushë Kosovë, Obiliq, Drenas dhe Podujevë situata ka qenë e qetë, pa nevojë për intervenime. Të gjitha ndërhyrjet e nevojshme janë realizuar nga ekipet emergjente dhe kompanitë e kontraktuara nga komunat.
Në rajonin e Prizrenit, komunat Prizren, Suharekë, Rahovec dhe Mamushë nuk kanë raportuar thirrje për ndërhyrje. Në Malishevë janë kryer dy intervenime për shkak të rrugëve të bllokuara nga uji, ndërsa në Dragash është realizuar një intervenim teknik për pastrimin e një pusetë të bllokuar.
Në rajonin e Mitrovicës, një familje është evakuuar nga ekipet e zjarrfikësve në kompleksin “Amina”. Aktualisht, sipas AME-së, gjendja është më e qetë dhe pa rrezik të menjëhershëm për vërshime të reja. Në komunat Skenderaj dhe Vushtrri nuk janë raportuar raste që kërkojnë ndërhyrje, ndërsa në Termocentralin Kosova A është realizuar një intervenim urgjent me pompë thithëse me kapacitet të madh.
Në rajonin e Pejës, situata paraqitet stabile në të gjitha komunat, megjithatë kërkohet kujdes i shtuar në disa segmente të rrugëve Pejë–Rugovë dhe Pejë–Kullë për shkak të pranisë së ujit në rrugë.
Rajoni i Gjakovës raporton gjendje të qetë dhe stabile, me rënie të nivelit të ujit në lumenj, ndërsa është shënuar një rast bllokimi rruge si pasojë e shembjes së dheut. Në rajonin e Gjilanit, vërshime janë raportuar vetëm në rrugën e Kufcës në Gjilan, ndërsa në komunat e tjera situata mbetet e qetë.
AME vlerëson se situata aktuale nuk paraqet rrezik për përshkallëzim, ndërsa rreziqet kryesore lidhen me reshjet e borës, ngricat dhe vështirësitë në qarkullim. Qendra Operative e AME-së dhe strukturat përkatëse mbesin në gatishmëri të plotë 24 orë në ditë për monitorim dhe reagim sipas nevojës.
