Ushtria izraelite ka deklaruar se ka kryer një sulm me qëllim të vrasjes së udhëheqësve të lartë të Hamasit në kryeqytetin e Katarit, Doha, ku janë dëgjuar shpërthime të shumta.
Një burim nga Hamasi i tha Al Jazeera-s se sulmi ndodhi ndërsa një ekip negociator po diskutonte një propozim armëpushimi për Gazën, i paraqitur nga Shtetet e Bashkuara.
Vendi i shënjestruar në Doha ‘shumë pranë ndërtesave rezidenciale’
Suhaib Al-Assa, korrespondent i Al Jazeera Arabic, raporton se vendi i shënjestruar nga Izraeli në Doha ndodhet pranë një lagjeje rezidenciale – jo në një zonë të izoluar.
Al-Assa citoi zyrtarë të sigurisë të kenë thënë se prioriteti i tyre është sigurimi i vendit të ngjarjes dhe lokalizimi i dëmeve dhe viktimave.
“Procedurat e sigurisë janë shumë komplekse sepse po flasim për një vend jashtëzakonisht të ndjeshëm – një vend që është shumë pranë ndërtesave rezidenciale dhe shtëpive të njerëzve,” tha ai.
Katari dënon sulmin ‘qyqar’ izraelit ndaj Hamasit në Doha
Majed Al Ansari, zëdhënës i Ministrisë së Jashtme të Katarit, tha në një deklaratë se vendi “dënon me termat më të ashpër” sulmin, i cili, sipas tij, u krye ndaj ndërtesave rezidenciale që strehonin disa anëtarë të byrosë politike të Hamasit.
“Ky sulm kriminal përbën një shkelje flagrante të të gjitha ligjeve dhe normave ndërkombëtare dhe një kërcënim serioz për sigurinë dhe jetën e katarasve dhe banorëve të Katarit,” thuhet në deklaratë.
“Ndërsa dënon fuqishëm këtë sulm, Shteti i Katarit thekson se nuk do të tolerojë këtë sjellje të pamatur izraelite dhe ndërhyrjen e saj të vazhdueshme në sigurinë rajonale, si dhe çdo veprim që shënjestron sigurinë dhe sovranitetin e saj. Hetimet janë duke u zhvilluar në nivelin më të lartë, dhe detaje të mëtejshme do të shpallen sapo të bëhen të disponueshme.”
